យោងតាមការចុះផ្សាយពីប្រភពបរទេស ស្រ្តីភាគច្រើនតែងផ្ដោតសំខាន់លើការប្រើប្រាស់គ្រឿងសម្អាងពីខាងក្រៅ ប៉ុន្តែអ្នកជំនាញសុខភាពបានបញ្ជាក់ថា ការថែរក្សាស្បែកឱ្យមានសុខភាពល្អពិតប្រាកដ គឺត្រូវចាប់ផ្ដើមពីការផ្ដល់ជីវជាតិពីខាងក្នុងតាមរយៈរបបអាហារ។
ក្រៅពីការគេងឱ្យគ្រប់គ្រាន់ និងការហាត់ប្រាណ ការជ្រើសរើសផ្លែឈើដែលសម្បូរដោយវីតាមីន និងសារធាតុប្រឆាំងអុកស៊ីតកម្ម គឺជាវិធីសាស្ត្រដ៏វិសេសដើម្បីពន្យារភាពចាស់ និងធ្វើឱ្យស្បែកស្រស់ថ្លា។ ផ្លែឈើដំបូងគេគឺផ្លែទទឹម ជាពិសេសទទឹមក្រហមដែលសម្បូរទៅដោយវីតាមីន C, K, E និងសារធាតុប្រឆាំងអុកស៊ីតកម្មដ៏ខ្លាំងក្លា ដែលជួយកាត់បន្ថយការផលិតជាតិពណ៌មេឡានីន និងការពារស្បែកពីកាំរស្មី UV ធ្វើឱ្យស្បែកមានពណ៌សម្បុរស្មើគ្នា និងមានសំណើមពីខាងក្នុង។ បន្ទាប់មកគឺផ្លែក្រូចឆ្មារ ដែលសម្បូរវីតាមីន C ជួយជំរុញការផលិតខូឡាជែន និងកាត់បន្ថយបញ្ហាស្នាមអុជខ្មៅបានយ៉ាងមានប្រសិទ្ធភាព។
សម្រាប់អ្នកដែលចង់រក្សាភាពក្មេងជាងវ័យ ផ្លែទំពាំងបាយជូរគឺជាជម្រើសដ៏ល្អ ព្រោះវាមានសារធាតុជួយការពារកោសិកាស្បែកមិនឱ្យចុះខ្សោយ និងជួយបង្កើតកោសិកាថ្មីដើម្បីកាត់បន្ថយស្នាមជ្រីវជ្រួញ។ ចំណែកឯផ្លែមាន់វិញ ក៏មានអត្ថប្រយោជន៍មិនធម្មតាដែរ ដោយសារវាជួយកាត់បន្ថយការរលាក ការពារការកើតមុន និងជួយឱ្យស្បែកមិនស្ងួតប្រេះស្រកា។ រីឯផ្លែម្នាស់វិញ គឺសម្បូរទៅដោយអង់ស៊ីមពិសេសដែលជួយឱ្យមុខរបួសឆាប់ជាសះស្បើយ និងធ្វើឱ្យផ្ទៃមុខហ្មត់រលោងបាត់ស្នាមអុជខ្មៅ។ ដោយសារវដ្តនៃការផ្លាស់ប្តូរកោសិកាស្បែកកើតឡើងរៀងរាល់ ៣០ ថ្ងៃ ការផ្ដល់ជីវជាតិពីផ្លែឈើទាំងនេះឱ្យបានទៀងទាត់ គឺជារឿងចាំបាច់បំផុតដើម្បីឱ្យស្បែកកាន់តែរឹងមាំ និងភ្លឺរលោងជានិរន្តរ៍៕