យោងតាមការចុះផ្សាយពីប្រភពបរទេស ការមានក្បាលពោះធំមិនត្រឹមតែធ្វើឱ្យបាត់បង់ទំនុកចិត្តលើរូបរាងប៉ុណ្ណោះទេ ប៉ុន្តែវាក៏ជាសញ្ញាព្រមាននៃបញ្ហាសុខភាពផងដែរ។ ក្រៅពីការហាត់ប្រាណ និងការគ្រប់គ្រងអារម្មណ៍ ការជ្រើសរើសរបបអាហារគឺជាគន្លឹះដ៏សំខាន់បំផុត។
ប្រសិនបើអ្នកកំពុងស្វែងរកវិធីសម្រកខ្លាញ់ក្បាលពោះឱ្យមានប្រសិទ្ធភាព អ្នកគួរតែចាប់ផ្ដើមកាត់បន្ថយ ឬជៀសវាងអាហារ ៨ ប្រភេទដែលបង្កឱ្យមានការសន្សំសំចៃខ្លាញ់មិនល្អនៅក្នុងរាងកាយ។ អាហារដំបូងដែលគួរប្រយ័ត្នគឺពោតលីងដែលសម្បូរទៅដោយខ្លាញ់ប្រភេទដែលមិនត្រឹមតែបង្កឱ្យមានខ្លាញ់ក្បាលពោះប៉ុណ្ណោះទេ ប៉ុន្តែថែមទាំងបង្កើនហានិភ័យជំងឺបេះដូង និងដាច់សរសៃឈាមខួរក្បាលទៀតផង។ បន្ទាប់មកគឺនំបុ័ងផ្អែម ឬនំកញ្ចប់ផ្សេងៗ ដែលសម្បូរទៅដោយស្ករ និងខ្លាញ់មិនល្អ ដែលងាយធ្វើឱ្យរាងកាយឡើងទម្ងន់យ៉ាងរហ័ស។
ចំពោះអាហារពេលព្រឹក អ្នកគួរជៀសវាងធញ្ញជាតិដែលមានជាតិស្ករខ្ពស់ព្រោះវាខ្វះជាតិសរសៃ និងប្រូតេអ៊ីន ដែលធ្វើឱ្យអ្នកឆាប់ឃ្លាន និងចង់ញ៉ាំអាហារច្រើនលើសកម្រិតនៅពេលបន្ទាប់។ ស្រដៀងគ្នានេះដែរ អាហារបំពង និងអាហាររហ័សក៏ជាមូលហេតុចម្បងដែលបង្កឱ្យមានខ្លាញ់រុំសរីរាង្គខាងក្នុងយ៉ាងគ្រោះថ្នាក់។ ចំណែកឯបង្អែមត្រជាក់ៗដូចជា ការ៉េម និងស្ករគ្រាប់វិញ គឺសម្បូរទៅដោយស្ករ និងកាឡូរីទទេ ដែលមិនបានផ្ដល់ថាមពលយូរអង្វែងឡើយ ប៉ុន្តែវាបែរជាទៅសន្សំទុកជាខ្លាញ់នៅត្រង់ក្បាលពោះជំនួសវិញ។
ក្រៅពីរបស់ផ្អែម សាច់កែច្នៃដូចជា សាច់ក្រក សាច់ប៉ាត់តេ និងសាច់បន្ទះក៏ជាសត្រូវនៃរាងស្លីមផងដែរ ហើយការញ៉ាំវាញឹកញាប់អាចបង្កើនហានិភ័យនៃជំងឺមហារីកពោះវៀនធំទៀតផង។ ជាចុងក្រោយ នំបុ័ងស ដែលខ្វះជាតិសរសៃ ក៏ជាអាហារដែលអ្នកគួរផ្លាស់ប្តូរមកញ៉ាំនំបុ័ងធញ្ញជាតិវិញ ដើម្បីជួយឱ្យឆ្អែតបានយូរ និងកាត់បន្ថយការឃ្លានអាហារផ្អែម។ ការងាកមកទទួលទានផ្លែឈើស្រស់ គ្រាប់ធញ្ញជាតិ និងការធ្វើអាហារសម្រន់ដោយខ្លួនឯង គឺជាវិនិយោគដ៏ឈ្លាសវៃដើម្បីទទួលបានក្បាលពោះរាបស្មើ និងសុខភាពមាំមួនជានិរន្តរ៍៕