យោងតាមការចុះផ្សាយពីប្រភពបរទេស តើអ្នកធ្លាប់ដឹងទេថា ទម្លាប់ដាក់ច្រាសដុសធ្មេញបញ្ឈរក្នុងកែវបន្ទាប់ពីប្រើរួច ដែលយើងតែងតែធ្វើរាល់ថ្ងៃនោះ អាចប្រែច្រាសដុសធ្មេញឱ្យទៅជា “ជម្រកបាក់តេរី” ដ៏កខ្វក់មិនចាញ់ច្រាសដុសបង្គន់ឡើយ? លោកវេជ្ជបណ្ឌិត នាយកគ្លីនិកធ្មេញនៅប្រទេសជប៉ុន បានចេញមុខព្រមានថា ការដាក់ច្រាសបញ្ឈរនឹងធ្វើឱ្យដំណក់ទឹកហូរទៅដក់នៅ “គល់រោមច្រាស” បង្កើតជាភាពផ្អាប់ និងសើម ដែលជាមជ្ឈដ្ឋានដ៏ល្អបំផុតសម្រាប់មេរោគរីកដុះដាលយ៉ាងរហ័ស។
តាមការស្រាវជ្រាវ នៅក្នុងមាត់របស់យើងសម្បូរទៅដោយបាក់តេរីយ៉ាងច្រើនសន្ធឹកសន្ធាប់ ដែលក្នុងអំឡុងពេលដុសធ្មេញ មេរោគទាំងនោះនឹងឆ្លងទៅទុំជាប់នឹងរោមច្រាស។ ប្រសិនបើច្រាសនៅតែសើមជានិច្ច វានឹងក្លាយជាកន្លែងសន្សំមេរោគរាប់លាន ហើយបើអ្នកកំពុងមានជំងឺផ្ដាសាយទៀតនោះ មេរោគដែលទុំជាប់ច្រាសសើមៗអាចធ្វើឱ្យអ្នកឆ្លងជំងឺដដែលៗមកវិញមិនងាយជាសះស្បើយឡើយ។
ដើម្បីរក្សាអនាម័យមាត់ធ្មេញឱ្យបានខ្ពស់បំផុត គ្រូពេទ្យជប៉ុនបានណែនាំពីវិធីទុកដាក់ច្រាសដុសធ្មេញឱ្យបានត្រឹមត្រូវដូចខាងក្រោម៖
ដំបូងបង្អស់ ក្រោយពេលប្រើរួច អ្នកត្រូវ “រលាស់ច្រាស” ឱ្យខ្លាំងដើម្បីដេញដំណក់ទឹកដែលទុំជាប់តាមរោមច្រាសឱ្យចេញអស់តាមដែលអាចធ្វើទៅបាន។ បន្ទាប់មក ជំនួសឱ្យការដាក់ដោតបញ្ឈរក្នុងកែវ អ្នកគួរផ្លាស់ប្តូរមក “ដាក់ច្រាសក្នុងដេកផ្កាប់” (ដោយផ្កាប់សរសៃច្រាសចុះក្រោម) ដើម្បីការពារកុំឱ្យទឹកហូរទៅដក់នៅគល់រោមច្រាស។ ភាពស្ងួតគឺជាគន្លឹះដ៏សំខាន់បំផុតក្នុងការទប់ស្កាត់ការកកើតនៃបាក់តេរី។
ក្រៅពីរបៀបទុកដាក់ច្រាស បរិយាកាសក្នុងបន្ទប់ទឹកក៏សំខាន់មិនចាញ់គ្នាដែរ។ អ្នកគួរប្រាកដថាបន្ទប់ទឹកមានខ្យល់ចេញចូលបានល្អ និងគ្មានភាពផ្អាប់ខ្លាំងពេក។ ការផ្លាស់ប្តូរទម្លាប់តូចតាចពីការដាក់ច្រាសបញ្ឈរ មកជារលាស់ឱ្យស្ងួតរួចដាក់ដេកផ្កាប់វិញ នឹងជួយការពារសុខភាពមាត់ធ្មេញរបស់អ្នកពីបាក់តេរីរាប់លានបានយ៉ាងមានប្រសិទ្ធភាព៕