យោងតាមការចុះផ្សាយពីប្រភពបរទេស ការកសាងស្នេហាមួយឱ្យមានសុភមង្គល មិនមែនផ្អែកលើតែពេលវេលាដែលនៅជាមួយគ្នាយូរនោះទេ ប៉ុន្តែវាទាមទារនូវការយល់ចិត្ត និងការផ្ដល់តម្លៃឱ្យគ្នាទៅវិញទៅមកយ៉ាងហ្មត់ចត់។ សម្រាប់សុភាពបុរសដែលចង់ក្លាយជាដៃគូដ៏ល្អបំផុតនៅឆ្នាំនេះ អ្នកអាចសាកល្បងអនុវត្តយុទ្ធសាស្ត្រ “ចិញ្ចឹមស្នេហា” តាមរយៈការផ្លាស់ប្តូរទម្លាប់ប្រចាំថ្ងៃងាយៗមួយចំនួន។
ជាដំបូង បុរសៗគួរចេះបង្កើតពេលវេលាសម្រាប់ “ជជែកពីអារម្មណ៍” បែបផ្លូវការ ដោយចំណាយពេលត្រឹម ១៥ ទៅ ៣០ នាទីក្នុងមួយសប្តាហ៍ ដើម្បីពិភាក្សាគ្នាពីអ្វីដែលបានធ្វើល្អ និងអ្វីដែលគួរកែលម្អ ដោយមិនត្រូវប្រើអារម្មណ៍ឆេវឆាវ ឬនិយាយគ្នានៅលើគ្រែឡើយ។ ទន្ទឹមនឹងនេះ ត្រូវរៀនធ្វើជា “អ្នកស្ដាប់ដ៏ពូកែ” ដោយដាក់ទូរស័ព្ទចុះ សម្លឹងភ្នែកនាង ហើយព្យាយាមយល់ពីអ្វីដែលនាងកំពុងនិយាយ ជាជាងការប្រញាប់ផ្ដល់មតិយោបល់ ឬការដោះស្រាយបញ្ហាដែលនាងមិនបានសុំ។
ចំណុចសំខាន់មួយទៀតគឺ ការចេះទទួលខុសត្រូវលើទង្វើខ្លួនឯង និងការបែងចែកតម្លៃផ្ទាល់ខ្លួនចេញពីកំហុស។ ការហ៊ានទទួលស្គាល់កំហុស និងការកែប្រែ មិនមែនមានន័យថាអ្នកបាត់បង់តម្លៃជាបុរសនោះទេ ប៉ុន្តែវាគឺជាការសាងទំនុកចិត្តយ៉ាងខ្លាំងក្លាដល់ដៃគូ។ បន្ថែមពីនេះ អ្នកគួរស្វែងយល់ពី “ភាសាស្នេហា” របស់នាងឱ្យបានច្បាស់ បើទោះបីជាវាមិនមែនជាស្ទីលរបស់អ្នកក៏ដោយ ដូចជាការផ្ដល់ពាក្យសរសើរជារៀងរាល់ថ្ងៃ ឬការផ្ដល់កាដូតូចតាចដែលបង្ហាញពីការយកចិត្តទុកដាក់ដោយមិនចាំបាច់មានឱកាសពិសេស។
ដើម្បីឱ្យស្នេហាកាន់តែមានភាពស្អិតល្មួត អ្នកគួរកំណត់ “តំបន់គ្មានបច្ចេកវិទ្យា” នៅក្នុងផ្ទះ ដូចជាតុអាហារ ឬបន្ទប់គេង ជាកន្លែងដែលគ្មានការប្រើប្រាស់ទូរស័ព្ទ ដើម្បីទុកឱកាសឱ្យអ្នកទាំងពីរបានសម្លឹងភ្នែកគ្នា និងជជែកគ្នាបែបធម្មជាតិ។ ជាចុងក្រោយ ត្រូវចេះអបអររាល់ “ការរីកចម្រើន” របស់គ្នាទៅវិញទៅមក បើទោះបីជាវាជារឿងតូចតាចក៏ដោយ ព្រោះការផ្ដល់កម្លាំងចិត្តឱ្យគ្នាទៅវិញទៅមកបែបនេះ នឹងបង្កើតឱ្យមានបរិយាកាសស្នេហាដ៏កក់ក្ដៅ និងគ្មានសម្ពាធ។
ការក្លាយជាបុរសដ៏ល្អម្នាក់ មិនមែនមានន័យថាអ្នកត្រូវតែជាមនុស្សល្អឥតខ្ចោះនោះទេ ប៉ុន្តែវាគឺជាការតាំងចិត្តអភិវឌ្ឍខ្លួនឯងជានិច្ច ដើម្បីមនុស្សដែលអ្នកស្រឡាញ់។ តើអ្នកត្រៀមខ្លួនរួចរាល់ហើយឬនៅ ក្នុងការដាក់ទូរស័ព្ទចុះ ហើយចំណាយពេលត្រឹម ១៥ នាទី ដើម្បីសួរដៃគូរបស់អ្នកថា “តើសប្តាហ៍នេះ តើខ្ញុំអាចធ្វើអ្វីខ្លះដើម្បីឱ្យអ្នកមានក្ដីសុខជាងមុន?”៕