យោងតាមការចុះផ្សាយពីប្រភពបរទេស ផ្កាខាត់ណាខៀវ គឺជាកំពូលបន្លែដែលមានជីវជាតិខ្ពស់ ប៉ុន្តែប្រសិនបើអ្នកចម្អិនខុសបច្ចេកទេស អ្នកអាចនឹងបាត់បង់សារធាតុចិញ្ចឹមសំខាន់ៗលើសពីពាក់កណ្ដាល។ បើតាមដំបូន្មានរបស់អ្នកជំនាញផ្នែកអាហារូបត្ថម្ភ អាថ៌កំបាំងដ៏សំខាន់មិនមែនស្ថិតនៅលើតែការចម្អិននោះទេ ប៉ុន្តែវាផ្ដើមចេញតាំងពី “ការរៀបចំ” និង “រយៈពេល” មុនពេលចម្អិនមកម៉្លេះ។
ដើម្បីទទួលបានអត្ថប្រយោជន៍អតិបរមាពីបន្លែប្រភេទនេះ អ្នកគួរអនុវត្តតាមតិចនិកសាមញ្ញៗដែលអ្នកវិទ្យាសាស្ត្ររកឃើញដូចខាងក្រោម៖
បន្ទាប់ពីហាន់ផ្កាខាត់ណាខៀវជាដុំតូចៗរួច អ្នកមិនគួរយកវាទៅចម្អិនភ្លាមៗឡើយ ប៉ុន្តែត្រូវ “ទុកចោលឱ្យវាប៉ះខ្យល់អាកាសរយៈពេល ១០ នាទី”។ មូលហេតុគឺដោយសារក្នុងបន្លែនេះមានសារធាតុម៉្យាងដែលនឹងបំប្លែងទៅជា “ស៊ុលហ្វូរ៉ាផាន” ដែលជាភ្នាក់ងារប្រឆាំងការរលាក និងប្រឆាំងមហារីកយ៉ាងពូកែ លុះត្រាតែវាមានពេលធ្វើប្រតិកម្មជាមួយអង់ស៊ីមក្នុងខ្លួនវាក្រោយពេលហាន់រួច។ ការចម្អិនភ្លាមៗដោយប្រើកម្ដៅខ្ពស់ នឹងសម្លាប់អង់ស៊ីមទាំងនោះ និងធ្វើឱ្យអ្នកមិនទទួលបានសារធាតុប្រឆាំងមហារីកពេញលេញឡើយ។
ចំពោះវិធីសាស្ត្រចម្អិន ការ “ចំហុយ” គឺជាជម្រើសដ៏ល្អបំផុតដើម្បីរក្សាវីតាមីន និងជាតិរ៉ែ ព្រោះវាប៉ះពាល់ទឹកតិចជាងការស្ងោរ។ អ្នកមិនគួរចំហុយលើសពី ៥ នាទីឡើយ ដើម្បីរក្សាភាពស្រស់ ពណ៌បៃតង និងការពារកុំឱ្យកម្ដៅបំផ្លាញអង់ស៊ីមទាំងអស់។ លើសពីនេះ បន្ទាប់ពីចម្អិនរួច ការបន្ថែមប្រេងអូលីវបន្តិចនឹងជួយឱ្យរាងកាយបឺតស្រូបវីតាមីនដែលរលាយក្នុងខ្លាញ់បានកាន់តែប្រសើរ។ ប្រសិនបើអ្នកចង់ឱ្យអង់ស៊ីមធ្វើការបានកាន់តែខ្លាំង អ្នកអាចញ៉ាំផ្កាខាត់ណាខៀវជាមួយគ្រឿងផ្សំដែលមានអង់ស៊ីមខ្ពស់ដូចជា ស្ពៃខ្មៅ ឬមើមឆៃថាវកិនស្រស់ៗ។
ការយកចិត្តទុកដាក់លើចំណុចតូចតាចដូចជាការរង់ចាំ ១០ នាទីក្រោយពេលហាន់បន្លែ អាចមើលទៅដូចជាការខាតពេល ប៉ុន្តែបើប្រៀបធៀបនឹងតម្លៃអាហារូបត្ថម្ភ និងសារធាតុប្រឆាំងមហារីកដ៏មហាសាលដែលអ្នកនឹងទទួលបាន វាគឺជាការវិនិយោគដ៏ចំណេញបំផុតសម្រាប់សុខភាពយូរអង្វែង។ ចងចាំរូបមន្តសាមញ្ញ៖ ហាន់ហើយចាំ ១០ នាទី រួចចំហុយមិនឱ្យលើសពី ៥ នាទី ដើម្បីទទួលបានសុខភាពល្អឥតខ្ចោះ៕