យោងតាមការចុះផ្សាយពីប្រភពបរទេស ការដាំជីរអង្កាមទុកញ៉ាំខ្លួនឯងមិនមែនជារឿងពិបាកឡើយ ឱ្យតែអ្នកដឹងពីតិចនិកគ្រឹះងាយៗមួយចំនួន។ ជីរអង្កាមគឺជាបន្លែដែលដុះលឿន និងមិនទាមទារការថែទាំច្រើននោះទេ ដែលអនុញ្ញាតឱ្យអ្នកមានស្លឹកស្រស់ៗសម្រាប់បេះញ៉ាំជារៀងរាល់ថ្ងៃ។
ដើម្បីចាប់ផ្ដើមដាំដំបូង អ្នកគ្រាន់តែត្រៀមថូដែលមានរន្ធបង្ហូរទឹក ដីដែលធូរ និងមែកជីរអង្កាមដែលមានសុខភាពល្អ។ តិចនិកសំខាន់គឺមុននឹងដាក់ដីចូលថូ អ្នកគួរយកស្លឹកឈើស្ងួតទ្រាប់បាតថូ ដើម្បីជួយសម្រួលដល់ការបង្ហូរទឹក ការពារកុំឱ្យជាំទឹកដែលនាំឱ្យរលួយឫស។ បន្ទាប់មកចាក់ដីដែលធូរមិនណែនពេកចូលឱ្យពេញប្រហែល ៨០ ភាគរយនៃថូ។
សម្រាប់ការជ្រើសរើសមែកដាំ អ្នកគួររើសមែកដែលមិនខ្ចីពេក និងមិនចាស់ពេក ដែលមានប្រវែងប្រហែល ១០ ទៅ ១៥ សង់ទីម៉ែត្រ រួចបេះស្លឹកផ្នែកខាងក្រោមចេញខ្លះមុននឹងដោតចូលក្នុងដីជម្រៅប្រហែល ៣ ទៅ ៥ សង់ទីម៉ែត្រ។ បន្ទាប់ពីដាំរួច ត្រូវស្រោចទឹកឱ្យជោកភ្លាមៗ និងបន្តស្រោចទឹក ១ ទៅ ២ ដងក្នុងមួយថ្ងៃ (ព្រឹក-ល្ងាច) ដើម្បីរក្សាសំណើមដីតែមិនឱ្យជោកជាំពេកឡើយ។
ចំណុចសំខាន់ដែលធ្វើឱ្យជីរអង្កាមដុះលឿនគឺ ការដាក់ថូនៅកន្លែងដែលមានពន្លឺថ្ងៃតិចៗ ឬត្រូវកម្ដៅថ្ងៃពេលព្រឹកប្រហែល ៣ ទៅ ៥ ម៉ោងក្នុងមួយថ្ងៃ។ ក្នុងរយៈពេលតែ ៧ ទៅ ១០ ថ្ងៃប៉ុណ្ណោះ វានឹងចាប់ផ្ដើមបែកត្រួយថ្មីយ៉ាងរហ័ស។ តិចនិកមាសដែលធ្វើឱ្យជីរអង្កាមបែកមែកស្លឹកដកកកគឺ ការឧស្សាហ៍បេះត្រួយខាងលើចេញ ដើម្បីជម្រុញឱ្យវាបែកមែកថ្មីកាន់តែច្រើន និងធ្វើឱ្យគុម្ពជីអង្កាមរបស់អ្នកកាន់តែធំស្អាត។
ការយកចិត្តទុកដាក់លើរឿងតូចតាចទាំងនេះ នឹងជួយឱ្យអ្នកមានសួនបន្លែតូចមួយនៅក្នុងផ្ទះ ដែលផ្ដល់នូវជីអង្កាមស្រស់ៗ សម្រាប់ញ៉ាំជាមួយអាហារ ឬធ្វើជាភេសជ្ជៈបានយ៉ាងយូរអង្វែង៕