យោងតាមការចុះផ្សាយពីប្រភពបរទេស ការបត់ជើងតូចគឺជាដំណើរការបញ្ចេញកាកសំណល់ពីរាងកាយតាមរយៈតម្រងនោម ប៉ុន្តែចំនួនដងនៃការបត់ជើងតូចអាចបញ្ជាក់ពីស្ថានភាពសុខភាពរបស់អ្នកបានយ៉ាងសំខាន់។ ជាទូទៅសម្រាប់មនុស្សពេញវ័យដែលមានសុខភាពល្អ ការបត់ជើងតូចក្នុងចន្លោះពី ៣ ទៅ ៥ ដងក្នុងមួយថ្ងៃ និងប្រហែល ១ ទៅ ២ ដងនៅពេលយប់ ត្រូវបានចាត់ទុកថាជារឿងធម្មតា។
ប្រសិនបើអ្នកបត់ជើងតូចញឹកញាប់រហូតដល់ ១០ ដងក្នុងមួយថ្ងៃ វាអាចបណ្ដាលមកពីកត្តាធម្មតាដូចជា ការញ៉ាំទឹកច្រើនពេក ការញ៉ាំភេសជ្ជៈដែលមានជាតិកាហ្វេអ៊ីន (កាហ្វេ តែ) ឬជាតិអាកុល និងស្ថានភាពមានផ្ទៃពោះជាដើម។ ទោះជាយ៉ាងណាក៏ដោយ ការបត់ជើងតូចញឹកញាប់ខុសធម្មតាក៏អាចជាសញ្ញាព្រមាននៃជំងឺមួយចំនួនដូចជា ជំងឺទឹកនោមផ្អែម ជំងឺតម្រងនោម ជំងឺក្រពេញប្រូស្តាតរីកធំចំពោះបុរស ឬការរលាកប្លោកនោមរ៉ាំរ៉ៃដែលអ្នកមិនគួរមើលរំលងឡើយ។
សម្រាប់ការកាត់បន្ថយអាការបត់ជើងតូចញឹកញាប់ អ្នកគួរអនុវត្តតាមតិចនិកងាយៗដូចជា ញ៉ាំទឹកក្នុងបរិមាណល្មមដែលរាងកាយត្រូវការ ជៀសវាងគ្រឿងស្រវឹង និងកាហ្វេអ៊ីន ហាត់ប្រាណឱ្យបានទៀងទាត់ និងរក្សាទម្ងន់ឱ្យស្ថិតក្នុងកម្រិតសមស្រប។ អ្វីដែលសំខាន់បំផុតគឺការហ្វឹកហាត់កុំទម្លាប់ទប់នោមយូរពេក ដែលអាចធ្វើឱ្យប៉ះពាល់ដល់សាច់ដុំប្លោកនោម។
ដោយឡែកសម្រាប់ក្មេងតូចៗ ការបត់ជើងតូចញឹកញាប់ជារឿងធម្មតាទេ ព្រោះប្លោកនោមរបស់ពួកគេនៅតូចមិនទាន់លូតលាស់ពេញលេញ។ ក្មេងអាយុក្រោម ២ ឆ្នាំអាចបត់ជើងតូចបានពី ១០ ទៅ ១៥ ដង ខណៈក្មេងលើសពី ២ ឆ្នាំអាចបត់ជើងតូចពី ៦ ទៅ ៨ ដងក្នុងមួយថ្ងៃ។ ប្រសិនបើអ្នកសង្កេតឃើញថាការបត់ជើងតូចមានសភាពពិបាក នោមមិនអស់ ឬមានឈាមមកជាមួយដែលរំខានដល់ជីវិតប្រចាំថ្ងៃ អ្នកគួរប្រញាប់ទៅជួបគ្រូពេទ្យដើម្បីពិនិត្យ និងព្យាបាលឱ្យបានទាន់ពេលវេលា៕