យោងតាមការចុះផ្សាយពីប្រភពបរទេស បញ្ហាអាវសដែលឆ្លងពណ៌ពីសម្លៀកបំពាក់ដទៃជារឿងគួរឱ្យឈឺក្បាល ប៉ុន្តែមុននឹងអ្នកសម្រេចចិត្តបោះវាចោល អ្នកគួរដឹងពីវិធីសាស្ត្រកម្ចាត់ស្នាមពណ៌ទាំងនោះដោយប្រសិទ្ធភាព។
ច្បាប់ដែកដាច់ខាតដែលអ្នកត្រូវចាំគឺហាមយកអាវដែលឆ្លងពណ៌ទៅហាលថ្ងៃឱ្យស្ងួតជាដាច់ខាត ព្រោះកម្ដៅថ្ងៃនឹងធ្វើឱ្យពណ៌កាន់តែជាប់ណែនក្នុងសាច់ក្រណាត់ដែលធ្វើឱ្យពិបាកដោះស្រាយនៅពេលក្រោយ។ វិធីសាស្ត្រដំបូងដែលអ្នកអាចប្រើបានគឺរូបមន្តទឹកខ្មេះ និងសាប៊ូបោកខោអាវ ដោយគ្រាន់តែលាយទឹកខ្មេះ ១ ទៅ ២ ពែង ជាមួយសាប៊ូបោកខោអាវក្នុងទឹកក្ដៅឧណ្ហៗ រួចត្រាំអាវចោលពី ៣០ ទៅ ៦០ នាទី បន្ទាប់មកញីត្រង់កន្លែងឆ្លងពណ៌តិចៗមុននឹងបោកសម្អាតតាមធម្មតា។ ប្រសិនបើជាប្រភេទក្រណាត់កប្បាសដែលធន់នឹងកម្ដៅ អ្នកថែមទាំងអាចយកអាវទៅស្ងោរក្នុងទឹកពុះដែលលាយទឹកខ្មេះប្រហែល ១០ ទៅ ២០ នាទី ដើម្បីឱ្យពណ៌ដែលឆ្លងនោះរបូតចេញកាន់តែលឿន។
សម្រាប់ការប្រើទឹកអូសាវ៉ែល វិធីនេះផ្ដល់លទ្ធផលលឿនបំផុតប៉ុន្តែត្រូវប្រើសម្រាប់តែក្រណាត់សសុទ្ធប៉ុណ្ណោះ ដោយលាយទឹកសាវ៉ែល ១ គម្រប ជាមួយទឹកក្ដៅឧណ្ហៗ រួចត្រាំអាវត្រឹមតែ ១៥ ទៅ ៣០ នាទីបានហើយ ព្រោះការត្រាំយូរពេកអាចធ្វើឱ្យក្រណាត់ផុយ ឬប្រែពណ៌ទៅជាលឿង។ ក្នុងករណីដែលអ្នកទើបតែដឹងថាអាវឆ្លងពណ៌ក្នុងពេលដែលវានៅសើមភ្លាមៗ អំបិលគឺជាជំនួយការដ៏ល្អបំផុត ដោយអ្នកគ្រាន់តែលាយអំបិល ១ ស្លាបព្រាបាយ ក្នុងទឹក ១ លីត្រ រួចត្រាំអាវចោល ៣០ នាទី ជាតិអំបិលនឹងជួយទាញពណ៌ដែលមិនទាន់ជ្រាបចូលសាច់ក្រណាត់ឱ្យរបូតចេញមកវិញយ៉ាងងាយស្រួល។ ក្រៅពីនេះ ការប្រើទឹកថ្នាំខាត់ស្នាមប្រឡាក់ជ្រៅៗមកលាបដោយផ្ទាល់លើកន្លែងឆ្លងពណ៌ រួចទុកចោលមួយសន្ទុះមុននឹងញីចេញ ក៏ជាជម្រើសដ៏ល្អសម្រាប់ស្នាមដែលពិបាកសម្អាត។
ការយកចិត្តទុកដាក់លើវិធីសាស្ត្រត្រឹមត្រូវ និងការចាត់វិធានការឱ្យបានទាន់ពេលវេលា នឹងជួយសន្សំសំចៃថវិការបស់អ្នក និងធ្វើឱ្យអាវសសំណព្វចិត្តត្រឡប់មកមានសោភណភាពដូចដើមវិញ។ ការយល់ដឹងពីតិចនិកសាមញ្ញៗទាំងនេះមិនត្រឹមតែជួយសង្គ្រោះសម្លៀកបំពាក់ប៉ុណ្ណោះទេ ប៉ុន្តែវាក៏ផ្ដល់នូវចំណេះដឹងផ្នែកមេផ្ទះដ៏សំខាន់សម្រាប់ជីវិតប្រចាំថ្ងៃផងដែរ៕