យោងតាមការចុះផ្សាយពីប្រភពបរទេស រឿងលើគ្រែមិនត្រឹមតែជាការផ្ដល់ក្ដីសុខឱ្យគ្នាទៅវិញទៅមកប៉ុណ្ណោះទេ ប៉ុន្តែវាក៏ជារឿងដែលត្រូវយកចិត្តទុកដាក់លើ “សុខភាព” ផងដែរ។ មនុស្សជាច្រើនតែងមានចម្ងល់ថា តើការបត់ជើងតូចមុន ឬក្រោយពេលរួមភេទ មានសារៈសំខាន់យ៉ាងណា ហើយវាពិតជាអាចការពារជំងឺបានមែនឬទេ?
ការយល់ដឹងពីអនាម័យត្រឹមត្រូវនឹងជួយឱ្យសកម្មភាពស្នេហារបស់អ្នកកាន់តែរលូន និងមានសុវត្ថិភាព។ ការបត់ជើងតូច “មុន” ពេលចាប់ផ្ដើមសកម្មភាព ជួយឱ្យអ្នកមានអារម្មណ៍ស្រឡះខ្លួន និងកាត់បន្ថយសម្ពាធក្នុងប្លោកនោម។ ប្រសិនបើអ្នកទុកឱ្យទឹកនោមពេញប្លោកនោមក្នុងពេលរួមភេទ កម្លាំងសង្កត់ ឬចលនាផ្សេងៗអាចប្ដូរពីអារម្មណ៍ស្រណុកស្រួល ទៅជាអារម្មណ៍ឈឺអួល ឬឆ្អល់ពោះ ដែលធ្វើឱ្យបាត់បង់អារម្មណ៍ស្រស់ស្រាយភ្លាមៗ។ លើសពីនេះ វាក៏ជួយការពារកុំឱ្យមានគ្រោះថ្នាក់អចេតនាដូចជាការលេចទឹកនោម ដែលនាំឱ្យរំខានដល់បរិយាកាសដ៏រ៉ូមែនទិកផងដែរ។
ចំណុចដែលសំខាន់បំផុតគឺការបត់ជើងតូច “ក្រោយ” ពេលបញ្ចប់បេសកកម្មស្នេហា ក្នុងរង្វង់ ១៥ ទៅ ៣០ នាទី។ នេះគឺជា “ខែលការពារ” ដ៏រឹងមាំសម្រាប់សុខភាព ជាពិសេសចំពោះសុភាពនារី។ ក្នុងពេលរួមភេទ បាក់តេរីអាចនឹងប្រមូលផ្ដុំនៅក្បែរផ្លូវនោម ដូច្នេះការបត់ជើងតូចចេញមក គឺជាការ “លាងជម្រះ” មេរោគទាំងនោះចេញពីរាងកាយ មុនពេលវាជ្រៀតចូលទៅក្នុងប្លោកនោម។ ទម្លាប់នេះជួយកាត់បន្ថយហានិភ័យនៃជំងឺ “រលាកប្លោកនោម” បានយ៉ាងមានប្រសិទ្ធភាព។
ទោះជាយ៉ាងណាក៏ដោយ មានរឿងមួយដែលមនុស្សជាច្រើនតែងយល់ច្រឡំ គឺការបត់ជើងតូចក្រោយពេលរួមភេទ អាចការពារបានតែការឆ្លងមេរោគក្នុងផ្លូវនោមប៉ុណ្ណោះ ប៉ុន្តែ “មិនអាច” ការពារជំងឺឆ្លងតាមការរួមភេទ ដូចជា មេរោគអេដស៍ ស្វាយ ឬប្រមេះ បានឡើយ។ វិធីសាស្ត្រតែមួយគត់ដែលអាចការពារជំងឺឆ្លងទាំងនេះបានស្ទើរតែ ១០០ ភាគរយ គឺការប្រើប្រាស់ “ស្រោមអនាម័យ” ឱ្យបានខ្ជាប់ខ្ជួនគ្រប់ពេលមានសកម្មភាព។
ជារួម ដើម្បីសុខភាពល្អ និងភាពរីករាយទ្វេដង អ្នកគួរចងចាំរូបមន្តសាមញ្ញគឺ “ចូលបន្ទប់ទឹកមុនពេលផ្ដើម ដើម្បីភាពស្រឡះខ្លួន និងចូលបន្ទប់ទឹកក្រោយពេលចប់ ដើម្បីលាងជម្រះមេរោគ” រួមជាមួយការញ៉ាំទឹកស្អាតឱ្យបានច្រើន។ ការយល់ដឹង និងការអនុវត្តទម្លាប់អនាម័យតូចតាចទាំងនេះ នឹងជួយឱ្យអ្នករីករាយជាមួយជីវិតស្នេហាប្រកបដោយទំនុកចិត្ត និងសុវត្ថិភាពបំផុត៕