យោងតាមការចុះផ្សាយពីប្រភពបរទេស មនុស្សជាច្រើនជឿថាការជ្រើសរើសម៉ាស៊ីនត្រជាក់ដែលមានកម្លាំងសេះធំជាងទំហំបន្ទប់ នឹងធ្វើឱ្យបន្ទប់ត្រជាក់លឿន ម៉ាស៊ីនឆាប់សម្រាក និងជួយសន្សំសំចៃភ្លើងបានច្រើន ប៉ុន្តែតាមការពិត ការយល់ឃើញនេះអាចធ្វើឱ្យអ្នកខាតបង់ថវិកាលើថ្លៃអគ្គិសនីកាន់តែច្រើនដោយមិនដឹងខ្លួន។
ម៉ាស៊ីនត្រជាក់ដែលធំពេកធៀបនឹងទំហំបន្ទប់ នឹងធ្វើឱ្យបន្ទប់ត្រជាក់លឿនខ្លាំង ដែលបង្ខំឱ្យម៉ាស៊ីនកាត់ផ្ដាច់ដំណើរការញឹកញាប់ ហើយរាល់ពេលដែលម៉ាស៊ីនចាប់ផ្ដើមដំណើរការឡើងវិញ វាតម្រូវឱ្យប្រើកម្លាំងភ្លើងខ្លាំងបំផុតដើម្បីទាញកម្ដៅ ដែលនេះជាមូលហេតុចម្បងធ្វើឱ្យស៊ីភ្លើងខ្លាំងបំផុត។ សូម្បីតែម៉ាស៊ីនត្រជាក់ប្រភេទ Inverter ក៏ដោយ ប្រសិនបើកម្លាំងសេះធំពេក វានៅតែត្រូវកាត់ផ្ដាច់ដំណើរការដូចម៉ាស៊ីនធម្មតាដែរ ព្រោះបន្ទប់ត្រជាក់ហួសពីកម្រិតដែលវាអាចបន្ថយល្បឿនបាន ដែលធ្វើឱ្យបាត់បង់អត្ថប្រយោជន៍នៃការសន្សំសំចៃភ្លើងដែលជាចំណុចខ្លាំងរបស់វា។
ក្រៅពីបញ្ហាស៊ីភ្លើង ម៉ាស៊ីនត្រជាក់ដែលធំពេកធ្វើឱ្យអ្នកមានអារម្មណ៍មិនស្រណុកខ្លួន ទោះបីជាសីតុណ្ហភាពចុះទាបក៏ដោយ ដោយសារម៉ាស៊ីនត្រជាក់លឿនពេក រហូតគ្មានពេលគ្រប់គ្រាន់ក្នុងការបឺតស្រូបសំណើមចេញពីខ្យល់ ដែលនាំឱ្យអ្នកមានអារម្មណ៍ស្អិតខ្លួន អាប់អួរ និងអាចបង្កឱ្យមានបញ្ហាដុះផ្សិតនៅក្នុងបន្ទប់ក្នុងរយៈពេលវែងថែមទៀតផង។
ជម្រើសដែលល្អបំផុតគឺការជ្រើសរើសកម្លាំងសេះឱ្យសមស្របនឹងទំហំបន្ទប់ ដោយអ្នកអាចបន្ថែមកម្លាំងសេះបន្តិចបន្តួចប្រហែល ១០ ទៅ ២០ ភាគរយ តែក្នុងករណីដែលបន្ទប់របស់អ្នកត្រូវកម្ដៅថ្ងៃខ្លាំង មានពិដានខ្ពស់ ឬមានមនុស្សរស់នៅច្រើននាក់ប៉ុណ្ណោះ។
ជារួម ការប្រើកម្លាំងសេះធំមិនមែនជាដំណោះស្រាយសម្រាប់ការសន្សំសំចៃនោះទេ ប៉ុន្តែវាជាការបង្កើនបន្ទុកចំណាយ និងធ្វើឱ្យម៉ាស៊ីនដំណើរការមិនមានប្រសិទ្ធភាព។ ការវិនិយោគលើម៉ាស៊ីនដែលមានទំហំល្មមនឹងបន្ទប់ នឹងផ្ដល់នូវភាពត្រជាក់ដែលជាប់ជានិច្ច ជួយកាត់បន្ថយសំណើមបានល្អ និងចំណេញថ្លៃភ្លើងបានច្រើនបំផុតសម្រាប់ផាសុកភាព និងសេដ្ឋកិច្ចគ្រួសារយូរអង្វែង៕