យោងតាមការចុះផ្សាយពីប្រភពបរទេស ការសន្សំសំចៃដោយរក្សាអាហារសល់ទុកកម្តៅញ៉ាំបន្តជារឿងល្អ ប៉ុន្តែសម្រាប់អាហារ ៧ ប្រភេទនេះ ការកម្តៅឡើងវិញអាចផ្លាស់ប្តូរពីរបស់ឆ្ងាញ់ទៅជារបស់មានពិសដោយសារការបាត់បង់សារធាតុចិញ្ចឹម និងការកកើតសារធាតុពុលដែលប៉ះពាល់ដល់រាងកាយយ៉ាងធ្ងន់ធ្ងរ។
បន្លែស្លឹកបៃតងដូចជាពួយឡេង ត្រកួន និងជីរវ៉ាន់ស៊ុយបារាំង សម្បូរទៅដោយជាតិ “នីត្រាត” ដែលល្អចំពោះសុខភាពពេលឆ្អិនថ្មីៗ ប៉ុន្តែនៅពេលកម្តៅឡើងវិញ វានឹងប្រែជួទៅជា “នីត្រីត” ដែលជាសារធាតុបង្កមហារីក និងរំខានដល់លំហូរអុកស៊ីសែនក្នុងឈាម។ ចំពោះស៊ុត និងសាច់មាន់ ការកម្តៅឡើងវិញក្នុងកម្តៅខ្ពស់ធ្វើឱ្យរចនាសម្ព័ន្ធប្រូតេអ៊ីនប្រែប្រួល ដែលនាំឱ្យប្រព័ន្ធរំលាយអាហារធ្វើការធ្ងន់ បង្កឱ្យហើមពោះ ឬឈឺពោះ ហើយប្រសិនបើសាច់មាន់កម្តៅមិនក្ដៅដល់ស្រទាប់ក្នុងបំផុតទេ វានឹងធ្វើឱ្យបាក់តេរីរីកលូតលាស់បង្កឱ្យរាករូសបានយ៉ាងងាយ។
ចំណែកឯផ្សិត និងដំឡូងបារាំងក៏ត្រូវយកចិត្តទុកដាក់ខ្ពស់ដែរ ព្រោះផ្សិតគួរញ៉ាំភ្លាមៗក្រោយចម្អិន ដោយសារប្រូតេអ៊ីនរបស់វាឆាប់ខូចគុណភាព ដែលអាចប៉ះពាល់ដល់បេះដូង និងប្រព័ន្ធរំលាយអាហារពេលកម្តៅឡើងវិញ ខណៈដំឡូងបារាំងបើទុកចោលក្នុងសីតុណ្ហភាពបន្ទប់យូរពេក វានឹងបង្កើតបាក់តេរីដែលអាចបង្កពុល ហើយសូម្បីតែកម្តៅក្នុងម៉ាស៊ីនមីក្រូវ៉េវក៏មិនអាចសម្លាប់មេរោគនោះអស់ដែរ។ ចំពោះបាយស បញ្ហាមិនមែននៅត្រង់ការកម្តៅឡើយ ប៉ុន្តែស្ថិតលើការរក្សាទុក ព្រោះបើទុកបាយសចោលខាងក្រៅយូរពេក វានឹងបង្កើតស្ព័របាក់តេរី ដែលទោះបីជាអ្នកយកមកកម្តៅឱ្យក្ដៅខ្លាំងយ៉ាងណាក៏ដោយ ក៏សារធាតុពុលដែលបាក់តេរីបង្កើតឡើងនោះនៅតែមាន ដែលនាំឱ្យពុលចំណីអាហារបានជានិច្ច។
ដើម្បីសុខភាពល្អ អ្នកគួរចម្អិនអាហារក្នុងបរិមាណល្មមញ៉ាំអស់មួយពេល ឬប្រសិនបើត្រូវរក្សាទុក ត្រូវដាក់ក្នុងទូរទឹកកកឱ្យបានត្រឹមត្រូវភ្លាមៗក្រោយពេលបាត់ក្ដៅ។ ការការពារសុខភាព ចាប់ផ្ដើមពីការឈប់ទម្លាប់ស្ដាយរបស់សល់ដែលមិនគួរកម្តៅទាំងនេះ ដើម្បីធានាបាននូវសុខុមាលភាពយូរអង្វែងសម្រាប់ខ្លួនឯង និងក្រុមគ្រួសារ៕