យោងតាមការចុះផ្សាយពីប្រភពបរទេស ទឹកគឺជាប្រភពនៃជីវិត និងជាអ្នកទ្រទ្រង់មុខងាររាងកាយឱ្យដំណើរការបានល្អ ប៉ុន្តែការផឹកទឹកចំពេលវេលាដ៏សមស្រប នឹងជួយឱ្យអ្នកទទួលបានអត្ថប្រយោជន៍កាន់តែមហិមាចំពោះសុខភាព។
ពេលវេលាដំបូងដែលសំខាន់បំផុតគឺភ្លាមៗក្រោយភ្ញាក់ពីគេង ព្រោះរាងកាយបានខ្សោះជាតិទឹកបន្ទាប់ពីសម្រាកពេញមួយយប់ ដូច្នេះការផឹកទឹកមួយកែវនៅពេលព្រឹកព្រលឹមនឹងជួយបំពេញជាតិទឹកឡើងវិញ ជំរុញប្រព័ន្ធរំលាយអាហារឱ្យចាប់ផ្ដើមដំណើរការ និងរៀបចំរាងកាយឱ្យមានថាមពល។ ចំណែកការផឹកទឹកមួយកែវមុនពេលញ៉ាំអាហារ នឹងជួយកាត់បន្ថយអារម្មណ៍ឃ្លានខ្លាំង ដែលល្អបំផុតសម្រាប់អ្នកចង់សម្រកទម្ងន់ និងជួយឱ្យក្រពះស្រូបយកសារធាតុចិញ្ចឹមបានកាន់តែល្អប្រសើរ។ ក្នុងអំឡុងពេលញ៉ាំអាហារ អ្នកក៏អាចក្រេបទឹកបន្តិចបន្តួចដើម្បីជួយឱ្យអាហារទន់ងាយរំលាយ ប៉ុន្តែគួរជៀសវាងការផឹកទឹកច្រើនពេកភ្លាមៗមុនឬក្រោយបាយ ព្រោះវាអាចធ្វើឱ្យអាស៊ីតក្រពះចុះខ្សោយ។
សម្រាប់អ្នកដែលចូលចិត្តហាត់ប្រាណ ការផឹកទឹកមួយកែវយ៉ាងតិច ៣០ នាទីមុនចាប់ផ្ដើម គឺចាំបាច់ណាស់ដើម្បីការពារការខ្សោះជាតិទឹក និងរក្សាកម្រិតថាមពលឱ្យនៅនឹងនរ រួមទាំងការក្រេបទឹកតិចៗរាល់ ១៥ ទៅ ២០ នាទីម្ដងក្នុងអំឡុងពេលបញ្ចេញកម្លាំង ដើម្បីប៉ះប៉ូវជាតិទឹកដែលបាត់បង់តាមរយៈញើស និងរក្សាសមត្ថភាពរាងកាយឱ្យនៅខ្លាំងក្លា។ បន្ទាប់ពីហាត់ប្រាណរួច ការផឹកទឹកក៏នៅតែជារឿងមិនអាចខ្វះបាន ដើម្បីជួយដល់ការស្តារឡើងវិញនៃសាច់ដុំ និងបំពេញជាតិទឹកដែលបាត់បង់ទៅវិញឱ្យបានគ្រប់គ្រាន់។ ជាចុងក្រោយ ការផឹកទឹកបន្តិចបន្តួចមុនពេលចូលគេង នឹងជួយការពារការខ្សោះជាតិទឹកនៅពេលយប់ និងធ្វើឱ្យអ្នកគេងលក់ស្កប់ស្កល់បានល្អ ប៉ុន្តែត្រូវប្រុងប្រយ័ត្នកុំផឹកច្រើនពេករហូតដល់រំខានដល់ការក្រោកទៅបន្ទប់ទឹកញឹកញាប់។ ការយកចិត្តទុកដាក់លើពេលវេលានៃការផឹកទឹកទាំងនេះ គឺជាតិចនិកសាមញ្ញបំផុតក្នុងការថែរក្សារាងកាយឱ្យមានជាតិទឹកគ្រប់គ្រាន់ និងមានសុខភាពល្អពីខាងក្នុង៕