ហាត់ហើយឈឺខ្លួនមែនទេ? ស្គាល់កំពូលអាហារ ៥ មុខ ជួយបំបាត់ការរលាក និងស្ដារកម្លាំងបានរហ័ស

យោងតាមការចុះផ្សាយពីប្រភពបរទេស អាការឈឺចុកចាប់ ឬតឹងសាច់ដុំក្រោយពេលលើកទម្ងន់ ឬរត់ខ្លាំងៗ គឺជាសញ្ញានៃការរលាកកោសិកាសាច់ដុំ និងសន្លាក់។ ប្រសិនបើទុកចោលយូរ វានឹងធ្វើឱ្យប្រសិទ្ធភាពនៃការហាត់ប្រាណចុះខ្សោយ។ ដើម្បីជួយឱ្យរាងកាយងើបឡើងវិញបានរហ័ស និងត្រៀមខ្លួនសម្រាប់វគ្គបន្ទាប់ នេះគឺជាអាហារ ៥ មុខដែលអ្នកហាត់ប្រាណមិនគួររំលង៖

ត្រីសមុទ្រសម្បូរខ្លាញ់ល្អ ដូចជាត្រីសាលម៉ុង ឬត្រីធូណា សម្បូរទៅដោយអាស៊ីតខ្លាញ់អូមេហ្គា-៣ ​ដែលមានសមត្ថភាពខ្ពស់ក្នុងការកាត់បន្ថយអាការហើម និងឈឺចាប់សាច់ដុំ ព្រមទាំងជួយឱ្យសន្លាក់ដំណើរការបានយ៉ាងរលូន។ បន្ទាប់មកគឺ មើមល្មៀត ដែលជាឱសថធម្មជាតិដ៏ពូកែបំផុត ព្រោះវាមានសារធាតុ Curcumin ជួយទប់ស្កាត់ការរលាកសន្លាក់។ ដើម្បីឱ្យរាងកាយស្រូបយកជីវជាតិពីល្មៀតបានកាន់តែល្អ អ្នកគួរញ៉ាំវាជាមួយម្រេចខ្មៅបន្តិច។

ចំពោះអ្នកដែលចង់ជួសជុលកោសិកាសាច់ដុំដែលរងការខូចខាត ផ្លែឈើអម្បូរដងប៊ឺរី​ ដូចជាប៊្លូប៊ឺរី ឬស្ត្រប៊ឺរី គឺជាជម្រើសដ៏ល្អបំផុត ព្រោះវាសម្បូរសារធាតុប្រឆាំងអុកស៊ីតកម្ម ជួយកាត់បន្ថយសម្ពាធសាច់ដុំ និងបង្ការរបួសរ៉ាំរ៉ៃ។ រីឯ បន្លែបៃតងចាស់ ដូចជាផ្កាខាត់ណាខៀវ ឬស្ពៃពួយឡេង គឺជាប្រភពនៃម៉ាញ៉េស្យូម និងកាល់ស្យូម ដែលជួយគ្រប់គ្រងការកន្ត្រាក់សាច់ដុំ កាត់បន្ថយការរមួលក្រពើ និងកម្ចាត់អាស៊ីតឡាក់ទិកដែលធ្វើឱ្យយើងចុកពោះវៀនក្រោយហាត់រួច។

ជាចុងក្រោយគឺ គ្រាប់ធញ្ញជាតិ​ ដែលជាជម្រើសដ៏ល្អសម្រាប់អ្នកដែលមិនសូវចូលចិត្តញ៉ាំត្រី។ គ្រាប់ធញ្ញជាតិទាំងនេះផ្ដល់អាស៊ីតខ្លាញ់ល្អ និងប្រូតេអ៊ីន ជួយដល់ការជួសជុលរាងកាយជាប្រចាំ និងរក្សាសន្លាក់ឱ្យរឹងមាំ។ ការជ្រើសរើសញ៉ាំអាហារដែលត្រូវនឹងតម្រូវការរាងកាយក្រោយហាត់ប្រាណ គឺជាគន្លឹះសំខាន់ដែលជួយឱ្យអ្នកមានរាងកាយមាំមួន និងមានថាមពលជានិច្ចសម្រាប់ថ្ងៃបន្ទាប់៕