យោងតាមការចុះផ្សាយពីប្រភពបរទេស ការញ៉ាំកាហ្វេក្នុងអំឡុងពេលមានផ្ទៃពោះមិនមែនជាការហាមឃាត់ដាច់ខាតនោះទេ ព្រោះកាហ្វេមិនត្រឹមតែផ្ដល់ជាតិកាហ្វេអ៊ីនប៉ុណ្ណោះទេ ប៉ុន្តែវាក៏សម្បូរទៅដោយវីតាមីន B (B1, B2, B3, B5) ជាតិរ៉ែសំខាន់ៗដូចជា ម៉ង់ហ្គាណែស ប៉ូតាស្យូម និងសារធាតុប្រឆាំងអុកស៊ីតកម្ម។
ការញ៉ាំក្នុងកម្រិតសមស្រប អាចជួយឱ្យអ្នកម៉ាក់កាត់បន្ថយភាពហត់នឿយ បង្កើនថាមពល និងការចងចាំ។ អ្វីដែលកាន់តែពិសេស ការញ៉ាំជាតិកាហ្វេអ៊ីនតិចជាង ១០០ មិល្លីក្រាមក្នុងមួយថ្ងៃ អាចជួយកាត់បន្ថយហានិភ័យនៃជំងឺទឹកនោមផ្អែមពេលមានផ្ទៃពោះបានរហូតដល់ ៤៧%។
ទោះជាយ៉ាងណា ចំណុចដែលអ្នកម៉ាក់ត្រូវប្រុងប្រយ័ត្នបំផុតគឺ កម្រិតនៃជាតិកាហ្វេអ៊ីន។ យោងតាមអ្នកជំនាញ ស្រ្តីមានផ្ទៃពោះគួរទទួលទានជាតិកាហ្វេអ៊ីនសរុបមិនឱ្យលើសពី ២០០ មិល្លីក្រាមក្នុងមួយថ្ងៃ (រួមបញ្ចូលទាំងកាហ្វេ តែ បូរបោរ សូកូឡា និងភេសជ្ជៈប៉ូវកម្លាំង)។ ប្រសិនបើញ៉ាំច្រើនហួសកម្រិត ជាតិកាហ្វេអ៊ីនអាចកាត់បន្ថយលំហូរឈាមទៅកាន់ទារក ដែលនាំឱ្យមានហានិភ័យនៃការពន្យារការលូតលាស់ កូនកើតមកមិនគ្រប់គីឡូ ឬអាចបង្កឱ្យមានគ្រោះថ្នាក់ដល់ការរលូត និងការសម្រាលមុនកំណត់។
ដើម្បីសុវត្ថិភាពខ្ពស់បំផុត អ្នកម៉ាក់គួរជ្រើសរើសកាហ្វេសុទ្ធដែលមានសារធាតុបន្ថែមតិចតួច ជាជាងកាហ្វេកញ្ចប់ ឬកាហ្វេដាក់ទឹកដោះគោច្រើន ដើម្បីជៀសវាងការលើសជាតិស្ករ និងជាតិខ្លាញ់។ យកល្អ អ្នកគួរពិភាក្សាជាមួយគ្រូពេទ្យជំនាញ ដើម្បីដឹងពីស្ថានភាពសុខភាពជាក់ស្ដែង ព្រោះរាងកាយរបស់អ្នកម៉ាក់ម្នាក់ៗមានតម្រូវការខុសគ្នា។ ការរក្សាតុល្យភាពរវាងការញ៉ាំកាហ្វេ និងការទទួលទានអាហារបំប៉នចម្រុះមុខ គឺជាគន្លឹះដ៏សំខាន់បំផុតក្នុងការថែរក្សាសុខភាពទាំងអ្នកម៉ាក់ និងអាអូនក្នុងផ្ទៃឱ្យរឹងមាំ និងមានការអភិវឌ្ឍបានល្អឥតខ្ចោះ៕