យោងតាមការចុះផ្សាយពីប្រភពបរទេស ការកសាងសាច់ដុំមិនមែនពឹងផ្អែកតែលើការញ៉ាំសាច់ ឬម្សៅប្រូតេអ៊ីននោះទេ ជាតិវីតាមីន និងជាតិរ៉ែពីផ្លែឈើក៏ដើរតួនាទីយ៉ាងសំខាន់ក្នុងការជួយឱ្យសាច់ដុំលូតលាស់ និងឆាប់រឹងមាំឡើងវិញបន្ទាប់ពីហាត់ប្រាណ។ ខាងក្រោមនេះគឺជាផ្លែឈើ ៦ មុខដែលអ្នកហាត់ប្រាណគួរមានជាប់ខ្លួន៖
ត្របែក គឺជាស្ដេចផ្លែឈើសម្រាប់សាច់ដុំ ដោយវាផ្ដល់ប្រូតេអ៊ីនរហូតដល់ ២,៦ ក្រាមក្នុងទម្ងន់ ១០០ ក្រាម ព្រមទាំងសម្បូរវីតាមីន C ដែលជួយពង្រឹងភាពស៊ាំ និងជួសជុលកោសិកាដែលខូចខាត។ បន្ទាប់មកគឺ ទៀប ដែលផ្ដល់ប្រូតេអ៊ីន ២,១ ក្រាម និងសម្បូរទៅដោយកាបូអ៊ីដ្រាត ជួយបំពេញថាមពលដែលបាត់បង់បានយ៉ាងរហ័ស។ ចំណែក ខ្នុរ ក៏ជាជម្រើសដ៏ល្អសម្រាប់អ្នកហាត់ប្រាណដែរ ព្រោះវាសម្បូរប៉ូតាស្យូមជួយកាត់បន្ថយការចុករោយ និងជំរុញការស្ដារសាច់ដុំឡើងវិញ។
បន្ថែមពីនេះ ផ្លែទទឹម ដែលសម្បូរសារធាតុប្រឆាំងអុកស៊ីតកម្ម ជួយសម្រួលលំហូរឈាមទៅកាន់សាច់ដុំ និងកាត់បន្ថយការរលាក បន្ទាប់ពីការហ្វឹកហាត់ខ្លាំងក្លា។ សម្រាប់ ចេក វិញ វាគឺជាអាហារសម្រន់ដ៏ពេញនិយមបំផុត ព្រោះវាផ្ដល់ទាំងប្រូតេអ៊ីន ប៉ូតាស្យូម និងកាបូអ៊ីដ្រាត ដែលជួយការពារការរមួលក្រពើ និងផ្ដល់ថាមពលភ្លាមៗ។ ជាចុងក្រោយគឺ ល្ហុង ទោះបីជាវាមានប្រូតេអ៊ីនមិនសូវខ្ពស់ ប៉ុន្តែវាមានអង់ស៊ីម Papain ដែលជួយឱ្យរាងកាយរំលាយជាតិប្រូតេអ៊ីនបានកាន់តែល្អ និងជួយកាត់បន្ថយការឈឺចាប់សាច់ដុំ។
ការរួមបញ្ចូលផ្លែឈើទាំងនេះទៅក្នុងរបបអាហារប្រចាំថ្ងៃ មិនត្រឹមតែជួយឱ្យអ្នកទទួលបានសាច់ដុំស្អាត និងមាំមួនប៉ុណ្ណោះទេ ប៉ុន្តែវាក៏ជួយឱ្យរាងកាយទាំងមូលមានសុខភាពល្អ និងមានភាពរស់រវើកក្នុងការហាត់ប្រាណជារៀងរាល់ថ្ងៃផងដែរ៕