យោងតាមការចុះផ្សាយពីប្រភពបរទេស ប្រូតេអ៊ីនគឺជាសារធាតុចិញ្ចឹមដ៏សំខាន់សម្រាប់ជួសជុលសាច់ដុំ ពង្រឹងប្រព័ន្ធភាពស៊ាំ និងជួយឱ្យអ្នកឆាប់ឆ្អែត ដែលជាគន្លឹះមាសសម្រាប់ការសម្រកទម្ងន់។ សម្រាប់អ្នកដែលចង់បានរាងស្លីមមាំមួន អ្នកជំនាញអាហារូបត្ថម្ភបានណែនាំឱ្យជ្រើសរើសអាហារណាដែលមានប្រូតេអ៊ីនយ៉ាងតិច ៦ ក្រាម និងកាឡូរីមិនលើសពី ១៨០ ក្នុងមួយចំណែក៖
ទ្រូងមាន់ គឺជាជម្រើសលេខមួយសម្រាប់អ្នកហាត់ប្រាណ ដោយវាផ្ដល់ប្រូតេអ៊ីនរហូតដល់ ២៦ ក្រាម ប៉ុន្តែមានត្រឹម ១២០ កាឡូរីប៉ុណ្ណោះ។ ការញ៉ាំទ្រូងមាន់មិនត្រឹមតែជួយកសាងសាច់ដុំប៉ុណ្ណោះទេ ប៉ុន្តែវាក៏ជួយការពារដង់ស៊ីតេឆ្អឹង បង្ការជំងឺពុកឆ្អឹង និងធ្វើឱ្យអ្នកឆ្អែតបានយូរ។ បន្ទាប់មកគឺ បង្គា ដែលផ្ដល់ប្រូតេអ៊ីន ២៥ ក្រាម និងមានសារធាតុប្រឆាំងអុកស៊ីតកម្មជួយកាត់បន្ថយការរលាក ព្រមទាំងអាស៊ីតខ្លាញ់ល្អសម្រាប់បេះដូង និងខួរក្បាល។
សម្រាប់អ្នកចូលចិត្តអាហាររុក្ខជាតិ តៅហ៊ូ គឺជាប្រភពប្រូតេអ៊ីនដ៏អស្ចារ្យ (២២ ក្រាម) ដែលជួយកាត់បន្ថយហានិភ័យជំងឺបេះដូង មហារីក និងទឹកនោមផ្អែម។ ក្រៅពីនេះ សាច់ភ្លៅមាន់ (គ្មានស្បែក) និង ត្រីសាលម៉ុង ក៏ជាជម្រើសដ៏ល្អ ដោយត្រីសាលម៉ុងផ្ដល់បន្ថែមនូវអូមេហ្គា-៣ និងវីតាមីន D ដែលជួយកាត់បន្ថយការរលាក និងពង្រឹងមុខងារខួរក្បាល។
ជាចុងក្រោយគឺ យ៉ាអួក្រិក ដែលមានកាឡូរីទាបបំផុត (ត្រឹម ៩២ កាឡូរី) ប៉ុន្តែសម្បូរប្រូតេអ៊ីន និងប្រូបាយអូទិកជួយដល់ប្រព័ន្ធរំលាយអាហារ បង្កើនការដុតរំលាយអាហារ និងកាត់បន្ថយសម្ពាធឈាម។ ការបញ្ចូលអាហារទាំង ៦ មុខនេះទៅក្នុងរបបអាហារប្រចាំថ្ងៃ នឹងជួយឱ្យអ្នកសម្រេចគោលដៅសម្រកទម្ងន់បានយ៉ាងឆាប់រហ័ស ដោយមិនចាំបាច់បង្អត់អាហារ និងរក្សាបាននូវសុខភាពរឹងមាំពីខាងក្នុង៕