យោងតាមការចុះផ្សាយពីប្រភពបរទេស ការឆ្លងកាត់ជំងឺធ្ងន់ធ្ងរ ការវះកាត់ ឬការឆ្លងមេរោគផ្សេងៗ តែងតែបន្សល់ទុកនូវភាពទន់ខ្សោយ អស់កម្លាំង និងបាត់បង់ទំនុកចិត្តលើខ្លួនឯង។ ការស្ដារសុខភាពឡើងវិញគឺជាកិច្ចការដែលត្រូវការពេលវេលា និងការយកចិត្តទុកដាក់ខ្ពស់ ប៉ុន្តែប្រសិនបើអ្នកអនុវត្តតាមវិធីសាស្ត្រត្រឹមត្រូវ អ្នកនឹងអាចត្រឡប់មកមាំមួន និងមានថាមពលដូចមុនវិញបានយ៉ាងពិតប្រាកដ។
ដំបូងបង្អស់ អ្នកត្រូវ ពិភាក្សាជាមួយគ្រូពេទ្យជំនាញ ឱ្យបានដិតដល់ដើម្បីយល់ពីស្ថានភាពជាក់ស្ដែងនៃរាងកាយ និងដឹងពីអ្វីដែលគួរធ្វើ ឬគួរជៀសវាង។ ក្នុងដំណាក់កាលនេះ របបអាហារដើរតួនាទីយ៉ាងសំខាន់ ដោយអ្នកគួរ ផ្ដោតលើអាហារសម្បូរប្រូតេអ៊ីន ដូចជា ទ្រូងមាន់ ត្រី ស៊ុត និងសណ្ដែក ដើម្បីជួយជួសជុលកោសិកាដែលខូចខាត រួមជាមួយការញ៉ាំបន្លែផ្លែឈើឱ្យបានចម្រុះពណ៌ និងផឹកទឹកស្អាតឱ្យបានគ្រប់គ្រាន់។
ទន្ទឹមនឹងការញ៉ាំ អ្នកគួរ ចាប់ផ្ដើមហាត់ប្រាណតិចៗ ដូចជាការដើរយឺតៗ ឬយូហ្គាស្រាលៗ រួចសន្សឹមៗបង្កើនកម្រិតទៅតាមកម្លាំងជាក់ស្ដែង ដើម្បីជួយឱ្យរបត់ឈាមដើរស្រួល និងពង្រឹងសាច់ដុំឡើងវិញ។ អ្វីដែលមិនអាចខ្វះបានគឺ ការគេងលក់ឱ្យបានស្កប់ស្កល់ពី ៧ ទៅ ៩ ម៉ោង ក្នុងមួយយប់ ព្រោះវាជារយៈពេលដែលរាងកាយជួសជុលខ្លួនឯងបានល្អបំផុត។
ក្រៅពីសុខភាពកាយ សុខភាពចិត្ត ក៏ជារឿងសំខាន់ដែរ។ អ្នកគួររៀនគ្រប់គ្រងស្ត្រេសតាមរយៈការដកដង្ហើមវែងៗ ធ្វើសមាធិ និងព្យាយាម ត្រឡប់ទៅចូលរួមសង្គម ឬជួបជុំមិត្តភក្តិ និងក្រុមគ្រួសារ ដើម្បីបង្កើនកម្លាំងចិត្ត និងកាត់បន្ថយភាពឯកោ។ នេះក៏ជាឱកាសល្អបំផុតក្នុង ការផ្លាស់ប្តូរទម្លាប់អាក្រក់ ដូចជាការឈប់ជក់បារី កាត់បន្ថយគ្រឿងស្រវឹង និងអាហារមានជាតិខ្លាញ់ខ្ពស់ ដើម្បីការពារកុំឱ្យជំងឺត្រឡប់មកវិញ។
ជាចុងក្រោយ ការស្ដារសុខភាពត្រូវមានការអត់ធ្មត់ អ្នកគួរ កំណត់គោលដៅតូចៗ សម្រាប់ខ្លួនឯងក្នុងមួយថ្ងៃៗ ហើយអបអរសាទររាល់ពេលដែលអ្នកធ្វើបានសម្រេច ទោះបីជាគ្រាន់តែការដើរបានឆ្ងាយជាងមុនបន្តិចក៏ដោយ។ អ្វីដែលសំខាន់បំផុតគឺ ត្រូវស្ដាប់សម្លេងរាងកាយខ្លួនឯង បើហត់ត្រូវសម្រាក កុំបង្ខំកម្លាំងហួសហេតុពេក។ ការស្រឡាញ់ និងថែទាំខ្លួនឯងដោយក្ដីអត់ធ្មត់ នឹងក្លាយជាស្ពានចម្លងអ្នកឱ្យត្រឡប់មកមានជីវិតដ៏ស្រស់បំព្រង និងរឹងមាំជានិរន្តរ៍៕