យោងតាមការចុះផ្សាយពីប្រភពបរទេស បញ្ហា “ខ្ទាតប្រេង” នៅពេលបំពងសាច់ជ្រូក គឺជាឧបសគ្គធំដែលធ្វើឱ្យមនុស្សជាច្រើនរុញរាក្នុងការចូលផ្ទះបាយ ព្រោះក្រៅពីធ្វើឱ្យកខ្វក់ជុំវិញចង្ក្រាន វាក៏ប្រឈមនឹងការរលាកស្បែកផងដែរ។ មូលហេតុចម្បងដែលនាំឱ្យខ្ទាតប្រេង គឺបណ្ដាលមកពីសំណើម ឬទឹកដែលមាននៅក្នុងសាច់ជ្រូក។ នៅពេលទឹកជួបនឹងប្រេងក្តៅខ្លាំង វានឹងប្រែជាចំហាយយ៉ាងរហ័ស និងរុញច្រានប្រេងឱ្យខ្ទាតចេញមកក្រៅ។ ដើម្បីដោះស្រាយបញ្ហានេះ អ្នកអាចអនុវត្តតាមតិចនិកងាយៗដូចខាងក្រោម៖
ដំបូងបង្អស់ អ្នកត្រូវ ជូតសាច់ជ្រូកឱ្យស្ងួតល្អ ដោយប្រើក្រដាសអនាម័យសម្រាប់ផ្ទះបាយ ជូតលើផ្ទៃសាច់ទាំងមុនពេលប្រឡាក់ និងមុនពេលដាក់ចូលខ្ទះ។ តិចនិកដ៏ឆ្លាតវៃមួយទៀតគឺ ការរោយម្សៅបំពងស្រួយស្តើងៗ លើសាច់ជ្រូក ដើម្បីឱ្យម្សៅជួយបឺតស្រូបសំណើមដែលនៅសេសសល់ ដែលវាមិនត្រឹមតែជួយកាត់បន្ថយការខ្ទាតប្រេងប៉ុណ្ណោះទេ ប៉ុន្តែថែមទាំងជួយឱ្យសាច់ស្រួយជាងមុនទៀតផង។ ក្រៅពីនេះ អ្នកអាច រោយអំបិលម៉ដ្ឋបន្តិចចូលក្នុងខ្ទះ មុនពេលចាក់ប្រេង ឬពេលប្រេងកំពុងក្ដៅ ព្រោះអំបិលមានសមត្ថភាពជួយបឺតសំណើមពីក្នុងខ្ទះបានយ៉ាងល្អ។
ចំពោះការគ្រប់គ្រងកម្ដៅ អ្នកគួរប្រើ ភ្លើងកម្រិតមធ្យមទៅខ្លាំង និងរង់ចាំឱ្យប្រេងក្ដៅសព្វល្អសិន ចាំដាក់សាច់ចូល។ ប្រសិនបើប្រេងមិនទាន់ក្ដៅខ្លាំង វានឹងធ្វើឱ្យសាច់ជ្រូកភាយទឹកចេញមកច្រើន បណ្ដាលឱ្យខ្ទាតប្រេងខ្លាំង និងធ្វើឱ្យសាច់ជ្រូក “ជប់ប្រេង” ញ៉ាំទៅទ្រលាន់។ ប៉ុន្តែត្រូវប្រយ័ត្នកុំឱ្យក្ដៅរហូតដល់ហុយផ្សែង ព្រោះវានឹងធ្វើឱ្យខ្លោចខាងក្រៅតែខាងក្នុងមិនទាន់ឆ្អិន និងខូចគុណភាពប្រេង។
ដើម្បីសុវត្ថិភាពបន្ថែម អ្នកគួរ ប្រើគម្របសំណាញ់ ដែលអាចបញ្ចេញចំហាយទឹកបាន តែអាចទប់តំណក់ប្រេងមិនឱ្យខ្ទាតចេញមកក្រៅ (មិនគួរប្រើគម្របឆ្នាំងបិទជិតឡើយ ព្រោះវាបង្កជាតំណក់ទឹកស្រក់ចូលខ្ទះធ្វើឱ្យខ្ទាតកាន់តែខ្លាំង)។ ម្យ៉ាងវិញទៀត មិនគួរដាក់សាច់ជ្រូកណែនខ្ទះពេកទេ ព្រោះវានឹងធ្វើឱ្យសីតុណ្ហភាពប្រេងធ្លាក់ចុះលឿន នាំឱ្យសាច់ជ្រូកភាយទឹកចេញមក និងជប់ប្រេង។ ការជ្រើសរើសប្រភេទប្រេងសម្រាប់បំពង ដូចជាប្រេងដូង ឬប្រេងកន្ទក់ ក៏ជួយឱ្យសាច់ជ្រូកឆ្អិនស្រួយល្អ និងកាត់បន្ថយប្រតិកម្មជាមួយសំណើមបានយ៉ាងមានប្រសិទ្ធភាពផងដែរ៕