យោងតាមការចុះផ្សាយពីប្រភពបរទេស ក្នុងវិទ្យាសាស្ត្រសុខភាព សាច់ដុំកំភួនជើងត្រូវបានគេប្រសិទ្ធនាមថាជា “បេះដូងទីពីរ” របស់រាងកាយ។ នេះក៏ព្រោះតែរាល់ពេលដែលសាច់ដុំកំភួនជើងកន្ត្រាក់ វានឹងបង្កើតកម្លាំងរុញច្រានឈាមពីចុងជើងឱ្យហូរត្រឡប់ទៅកាន់បេះដូងវិញដោយបញ្រ្ចាសនឹងកម្លាំងទំនាញផែនដី។ ការហាត់ប្រាណដោយការ “ឈរលើចុងជើង” ឬការអើតកែងជើង គឺជាវិធីសាស្ត្រដ៏សាមញ្ញបំផុតក្នុងការដាស់បេះដូងទីពីរនេះឱ្យធ្វើការកាន់តែមានប្រសិទ្ធភាព។
អត្ថប្រយោជន៍ដ៏អស្ចារ្យនៃការឈរអើតកែងជើង គឺជួយជំរុញ ប្រព័ន្ធរបត់ឈាម ឱ្យរត់បានសព្វពេញរាងកាយ។ នៅពេលចរន្តឈាមដើរស្រួល វានឹងជួយឱ្យសរីរាង្គក្នុង ជាពិសេសគឺ តម្រងនោម ទទួលបានឈាម និងអុកស៊ីសែនគ្រប់គ្រាន់ដើម្បីចម្រោះជាតិពុលបានល្អជាងមុន។ សម្រាប់បុគ្គលិកការិយាល័យដែលអង្គុយយូរ ឬមនុស្សចាស់ដែលមិនសូវមានសកម្មភាពរាងកាយ ការធ្វើលំហាត់ប្រាណនេះជារៀងរាល់ថ្ងៃ នឹងជួយកាត់បន្ថយអាការស្ពឹកជើង ហើមជើង និងការពារបញ្ហាសរសៃឈាមវ៉ែនបានយ៉ាងពូកែ។
ក្រៅពីជួយដល់របត់ឈាម ការឈរលើចុងជើងក៏ជួយពង្រឹងកម្លាំងសាច់ដុំជើង និងលំនឹងរាងកាយ ដែលជាគ្រឹះដ៏សំខាន់ក្នុងការ បង្ការការដួល ចំពោះមនុស្សចាស់។ ការមានកំភួនជើង និងកជើងរឹងមាំ ជួយឱ្យយើងរក្សាលំនឹងបានល្អពេលដើរ ឬរអិល ដែលកាត់បន្ថយហានិភ័យនៃគ្រោះថ្នាក់បាក់ឆ្អឹង និងផលវិបាកផ្សេងៗ។ លើសពីនេះ វាក៏ជួយឱ្យសន្លាក់កជើងមានភាពបត់បែន និងជួយទ្រទ្រង់បាតជើងសម្រាប់អ្នកដែលមានបញ្ហាជើងរាបស្មើ ឬឆាប់ហត់ពេលដើរយូរ។
ដើម្បីទទួលបានប្រសិទ្ធភាពខ្ពស់បំផុត អ្នកគួរអនុវត្តតិចនិក “ឈរត្រង់ខ្លួន រួចសន្សឹមៗលើកកែងជើងឡើងឱ្យខ្ពស់ដោយផ្អែកទម្ងន់លើចុងជើង ទប់ឱ្យជាប់ ២-៣ វិនាទី រួចទម្លាក់ចុះវិញយឺតៗ”។ អ្នកអាចធ្វើបែបនេះពី ១០ ទៅ ២០ ដងក្នុងមួយជុំ និងធ្វើឱ្យបាន ២-៣ ជុំក្នុងមួយថ្ងៃ។ ចំពោះមនុស្សចាស់ គួរកាន់បង្អែកកៅអី ឬជញ្ជាំងដើម្បីការពារការដួល។ ទោះបីជាវាមិនមែនជាថ្នាំទិព្វព្យាបាលរោគគ្រប់មុខ ប៉ុន្តែការចំណាយពេលត្រឹមតែប៉ុន្មាននាទីធ្វើចលនានេះជារៀងរាល់ថ្ងៃ គឺជាជំហានតូចមួយដ៏មានតម្លៃក្នុងការថែរក្សាតម្រងនោម ពង្រឹងជើងឱ្យរឹងមាំ និងជួយឱ្យអ្នកមានសុខភាពល្អបានយូរអង្វែង៕