លែងជាបញ្ហាពេលឆ្នាំងបាយខូច! វិធីដាំបាយដោយប្រើមីក្រូវ៉េវ ឱ្យចេញមកទន់​ឆ្ងាញ់ និងរហ័សទាន់ចិត្ត

យោងតាមការចុះផ្សាយពីប្រភពបរទេស ការដាំបាយអាចនឹងក្លាយជារឿងពិបាក ប្រសិនបើអ្នកមិនមានឆ្នាំងបាយអគ្គិសនី ឬឆ្នាំងបាយខូចទាន់ហន់។ ប៉ុន្តែឧបករណ៍កម្ដៅអាហារ (Microwave) ដែលយើងប្រើរាល់ថ្ងៃ គឺជាជំនួយការដ៏ពូកែដែលអាចដាំបាយឱ្យឆ្អិនទន់ស្អាតក្នុងពេលត្រឹមតែប៉ុន្មាននាទី ដែលស័ក្តិសមបំផុតសម្រាប់អ្នករស់នៅខុនដូ បន្ទប់ជួល ឬអ្នកដែលចង់ចំណេញពេលវេលាក្នុងការលាងសម្អាត។

ដើម្បីដាំបាយតាមវិធីនេះ អ្នកត្រូវត្រៀមចានសេរ៉ាមិច ឬចានកែវដែលមានជម្រៅជ្រៅល្មម (ដើម្បីការពារកុំឱ្យទឹកបាយពុះហៀរ) និងមានគម្របបិទជិត។ ជំហានដំបូងគឺត្រូវលាងអង្ករឱ្យស្អាត ១ ទៅ ២ ទឹក រួចវាស់កម្រិតទឹកឱ្យបានត្រឹមត្រូវ ដោយអង្ករផ្កាម្លិះប្រើសមាមាត្រ អង្ករ ១ ភាគ ទល់នឹងទឹក ១.៥ ភាគ ចំណែកអង្ករសធម្មតាប្រើអង្ករ ១ ភាគ ទល់នឹងទឹក ២ ភាគ។ តិចនិកពិសេសគឺគួរត្រាំអង្ករចោលក្នុងទឹកប្រហែល ១០ ទៅ ១៥ នាទីមុនពេលដាក់ចូលក្នុងម៉ាស៊ីន ដើម្បីឱ្យគ្រាប់បាយចេញមកកាន់តែទន់ល្អ។

បន្ទាប់មក ដាក់ចានបាយដែលគ្របជិតចូលក្នុង Microwave ដោយប្រើកម្លាំងខ្លាំងបំផុត​រយៈពេល ១០ នាទី។ នៅពេលគ្រប់កំណត់ ត្រូវយកចានបាយមកកូរឱ្យសព្វ រួចដាក់ដាំបន្តដោយប្រើកម្លាំងមធ្យមរយៈពេល ៥ នាទីទៀត។ ចំណុចសំខាន់បំផុតគឺក្រោយពេលម៉ាស៊ីនលោតឈប់ កុំអាលបើកគម្របភ្លាមៗអី ត្រូវទុកវាចោលក្នុងនោះប្រហែល ៥ នាទីទៀត ដើម្បីឱ្យចំហាយទឹកជួយរម្ងាស់ឱ្យគ្រាប់បាយរីកធំទន់ស្អាត និងមានរសជាតិឆ្ងាញ់ពិសា។

វិធីនេះមិនត្រឹមតែរហ័សប៉ុណ្ណោះទេ ប៉ុន្តែថែមទាំងជួយឱ្យអ្នកមិនចាំបាច់ហត់នឿយក្នុងការដុសលាងឆ្នាំងបាយធំៗទៀតផង៕