​ចង់ឱ្យផ្ទះត្រជាក់ត្រជុំ និងហៅលាភសំណាងមែនទេ? ស្គាល់រុក្ខជាតិមង្គល ៧ ប្រភេទ ដែលគួរដាំក្នុងផ្ទះ ជួយលើករាសី និងទាក់ទាញទ្រព្យសម្បត្តិ

យោងតាមការចុះផ្សាយពីប្រភពរទេស ការតុបតែងផ្ទះឱ្យស្អាតតែមួយមុខគឺមិនទាន់គ្រប់គ្រាន់ទេ សម្រាប់អ្នកដែលជឿលើក្បួនហុងស៊ុយ និងជំនឿបុរាណ។ ការដាំរុក្ខជាតិមង្គលនៅក្នុងផ្ទះ មិនត្រឹមតែជួយឱ្យបរិយាកាសស្រស់ស្រាយ និងជួយចម្រោះខ្យល់អាកាសប៉ុណ្ណោះទេ ប៉ុន្តែវាក៏ត្រូវបានគេជឿថាជាការទាក់ទាញថាមពលវិជ្ជមាន លាភសក្ការៈ និងសេចក្ដីសុខសាន្តដល់អ្នករស់នៅផងដែរ។

រុក្ខជាតិដំបូងគេដែលអ្នករកស៊ីមិនគួររំលងគឺ ដើម​ Zamioculcas​ ដែលតំណាងឱ្យការ “ខ្វាក់” ហៅប្រាក់កាស និងទ្រព្យសម្បត្តិឱ្យហូរចូលផ្ទះ ហើយវាអាចរស់នៅកន្លែងដែលមានពន្លឺតិចបានយ៉ាងល្អ។ បន្ទាប់មកគឺ ដើមឫស្សីសំណាង​ ដែលជួយពង្រឹងហុងស៊ុយខាងផ្នែកសុខភាព និងភាពចម្រុងចម្រើន។ ចំណែកឯ ដើមវាសនា​ វិញ ត្រូវបានគេជឿថាជួយជំរុញភាពជោគជ័យក្នុងជីវិត ហើយបើវាដុះផ្កាទៀតនោះ មានន័យថាអ្នកនឹងទទួលបានដំណឹងល្អ ឬលាភធំក្នុងពេលឆាប់ៗ។

សម្រាប់អ្នកដែលចង់ការពារថាមពលអវិជ្ជមាន ដើមអណ្តាតនាគ​ គឺជាជម្រើសដ៏ល្អបំផុត ព្រោះវាជួយការពាររឿងមិនល្អ និងជួយចម្រោះជាតិពុលក្នុងខ្យល់បានយ៉ាងពូកែស័ក្តិសិទ្ធិ។ រីឯ ដើមម្លូប្រាក់​ និង ដើមសេដ្ឋីក្នុងផ្ទះ​ គឺជាតំណាងនៃភាពមានបាន និងការកើនឡើងនៃទ្រព្យសម្បត្តិ ដែលងាយស្រួលដាំ និងមើលថែបំផុតសម្រាប់អ្នករស់នៅខុនដូ។ ចុងក្រោយគឺ ដើមកន្ទុយក្រពើ ដែលមិនត្រឹមតែជួយដេញឧបទ្រពចង្រៃប៉ុណ្ណោះទេ ប៉ុន្តែវាក៏ជាឱសថបុរាណដ៏មានប្រយោជន៍សម្រាប់ប្រើប្រាស់ក្នុងគ្រួសារផងដែរ។

តាមជំនឿហុងស៊ុយ រុក្ខជាតិពណ៌បៃតងតំណាងឱ្យ “ថាមពលនៃជីវិត” និងការរីកលូតលាស់។ ទោះបីជាអ្នកមិនសូវជឿលើរឿងមន្តអាគម ឬជំនឿបែបនេះក៏ដោយ ការមានរុក្ខជាតិបៃតងនៅក្នុងផ្ទះនឹងជួយឱ្យអារម្មណ៍ស្រស់ស្រាយ បន្ធូរបន្ថយភាពតានតឹង និងធ្វើឱ្យផ្ទះទាំងមូលមានសោភ័ណភាពគួរឱ្យចង់រស់នៅ។ ការចំណាយពេលបន្តិចបន្តួចដើម្បីរៀបចំ “ជ្រុងបៃតង” ក្នុងផ្ទះ គឺជាការវិនិយោគលើសេចក្ដីសុខ និងសំណាងល្អសម្រាប់ខ្លួនឯង និងមនុស្សជាទីស្រឡាញ់៕