យោងតាមការចុះផ្សាយពីប្រភពរទេស ទម្លាប់ដាំទឹកទុកផឹកច្រើនថ្ងៃ ឬការចាក់ទឹកថ្មីបង្គ្រប់ចូលក្នុងធុងទឹកចាស់ដែលមិនទាន់អស់ គឺជាកំហុសឆ្គងទូទៅដែលគ្រួសារភាគច្រើនតែងតែប្រព្រឹត្ត។ បើទោះបីជាការដាំទឹកពុះជួយកម្ចាត់មេរោគ និងប៉ារ៉ាស៊ីតបានយ៉ាងល្អក៏ដោយ ប៉ុន្តែទឹកដែលដាំពុះរួចមិនគួរទុកក្នុងរយៈពេលយូរពេកនោះទេ ព្រោះវាអាចប្រឈមនឹងការ “ឆ្លងមេរោគឡើងវិញ” យ៉ាងឆាប់រហ័ស។
មូលហេតុដែលទឹកដាំពុះទុកចោលយូរមានគ្រោះថ្នាក់ គឺដោយសារនៅពេលមេរោគត្រូវបានសម្លាប់ដោយកម្ដៅ ពួកវាបានបំប្លែងខ្លួនទៅជាសារធាតុសរីរាង្គ ដែលក្លាយជាប្រភពចំណីដ៏ល្អបំផុតសម្រាប់បាក់តេរីថ្មីៗដែលហោះចូលមកពីបរិស្ថានខាងក្រៅ។ នេះជាមូលហេតុដែលធ្វើឱ្យបាក់តេរីកើនឡើងចំនួនយ៉ាងលឿននៅក្នុងទឹកដែលទុកចោលយូរ។ ចំពោះរសជាតិទឹកដែលប្លែកក្រោយទុកចោលមួយយប់ គឺបណ្តាលមកពីឧស្ម័នកាបូនិចនៅក្នុងខ្យល់រលាយចូលទៅក្នុងទឹក ដែលទោះបីវាមិនបង្កគ្រោះថ្នាក់ធ្ងន់ធ្ងរ ប៉ុន្តែវាបង្ហាញថាទឹកចាប់ផ្ដើមបាត់បង់គុណភាពដើមហើយ។
ដើម្បីសុវត្ថិភាពសុខភាពល្អបំផុត អ្នកជំនាញណែនាំឱ្យទទួលទានទឹកដាំពុះឱ្យអស់ក្នុងរយៈពេលមួយថ្ងៃ និងចៀសវាងការទុកឆ្លងយប់។ អ្នកគួររក្សាទុកទឹកក្នុងដបកែវដែលបានសម្លាប់មេរោគស្អាត និងមានគម្របបិទជិតល្អ ជាជាងការប្រើប្រាស់ដបជ័រ ឬដបកែច្នៃឡើងវិញ។ ចំណុចសំខាន់បំផុតគឺមិនត្រូវចាក់ទឹកថ្មីបន្ថែមចូលក្នុងធុងដែលមានទឹកចាស់នៅសល់ឡើយ ព្រោះវាអាចនាំមេរោគពីទឹកចាស់មកបំពុលទឹកថ្មីភ្លាមៗ។
ការអនុវត្តទម្លាប់ដាំទឹកផឹកថ្មីៗជារៀងរាល់ថ្ងៃ គឺជាវិធីសាស្ត្រដ៏សាមញ្ញបំផុតក្នុងការការពាររាងកាយពីជំងឺផ្សេងៗដែលឆ្លងតាមរយៈទឹក៕