យោងតាមការចុះផ្សាយពីប្រភពបរទេស អាការៈឈឺខ្នង និងស្មា គឺជាបញ្ហាដែលជៀសមិនផុតសម្រាប់អ្នកធ្វើការការិយាល័យ ប៉ុន្តែប្រសិនបើបណ្ដោយឱ្យវាក្លាយជាជំងឺរ៉ាំរ៉ៃ វានឹងប៉ះពាល់ដល់គុណភាពជីវិតយ៉ាងធ្ងន់ធ្ងរ។
មូលហេតុចម្បងដែលបង្កឱ្យមានការឈឺចាប់ទាំងនេះ រួមមានការអង្គុយខុសក្បួនបច្ចេកទេស ការឱនងើបមិនសមស្រប ការប្រើប្រាស់សម្ភារការិយាល័យដែលមិនត្រូវនឹងសរីរាង្គ និងការទុកឱ្យរាងកាយស្ថិតក្នុងឥរិយាបថដដែលយូរពេក រហូតធ្វើឱ្យសាច់ដុំឡើងតឹងណែន។ ដើម្បីការពារ និងព្យាបាលបញ្ហានេះ អ្នកគួរចាប់ផ្ដើមពីការកែសម្រួលរបៀបអង្គុយឱ្យបានត្រឹមត្រូវ ដោយត្រូវអង្គុយឱ្យខ្នងត្រង់ជាប់នឹងបង្អែកកៅអី ដាក់ជើងទាំងពីឱ្យដល់ដី និងសារ៉េចូកុំព្យូទ័រឱ្យស្ថិតក្នុងកម្រិតភ្នែកល្មម ដើម្បីជៀសវាងការងើប ឬឱនកខ្លាំងពេក។
ការផ្ដល់ពេលវេលាឱ្យរាងកាយបានសម្រាក និងពន្ធឺសាច់ដុំ ក៏ជារឿងដែលមិនអាចខ្វះបានឡើយ។ អ្នកគួរឆ្លៀតពេលងើបដើរចេញពីតុធ្វើការរៀងរាល់ ៣០ ទៅ ៦០ នាទីម្ដង រួមជាមួយការហាត់ពត់ពែនខ្លួនងាយៗនៅនឹងកន្លែង ដូចជាការផ្អៀងកទៅសងខាង ការលើកស្មាឡើងចុះ និងការដាក់ដៃទៅក្រោយដើម្បីទាញសាច់ដុំទ្រូង និងខ្នងផ្នែកខាងលើ។ ការហាត់ប្រាណជាប្រចាំដូចជាការហែលទឹក ការហាត់យូហ្គា ឬការហាត់ពង្រឹងសាច់ដុំពោះ និងខ្នង ក៏នឹងជួយឱ្យឆ្អឹងកងខ្នងមានបង្អែករឹងមាំ និងកាត់បន្ថយសម្ពាធនៃការឈឺចាប់បានយ៉ាងមានប្រសិទ្ធភាព។
ក្រៅពីការថែទាំផ្នែករាងកាយ ការគ្រប់គ្រងភាពតានតឹងក្នុងចិត្តតាមរយៈការដកដង្ហើមវែងៗ ឬការធ្វើសកម្មភាពដែលចូលចិត្ត ក៏ជួយឱ្យសាច់ដុំស្មាកាត់បន្ថយការឡើងតឹងដោយមិនដឹងខ្លួនផងដែរ។ ទោះជាយ៉ាងណា ប្រសិនបើអ្នកមានអាការៈឈឺចាប់ខ្លាំងទៅៗ ឬមានអារម្មណ៍ថាស្ពឹក និងអស់កម្លាំងដៃជើង អ្នកគួរតែប្រញាប់ទៅពិគ្រោះជាមួយគ្រូពេទ្យជំនាញជាបន្ទាន់។ ការផ្លាស់ប្តូរទម្លាប់អង្គុយបន្តិចបន្តួច និងការយកចិត្តទុកដាក់លើការយឺតសាច់ដុំជារៀងរាល់ថ្ងៃ នឹងជួយឱ្យអ្នកធ្វើការបានយ៉ាងមានក្ដីសុខ មានប្រសិទ្ធភាព និងជៀសឆ្ងាយពីជំងឺការិយាល័យដែលគួរឱ្យខ្លាច៕