យោងតាមការចុះផ្សាយពីប្រភពបរទេស បច្ចុប្បន្ន ម្នាក់ក្នុងចំណោមមនុស្សពេញវ័យ ៣ នាក់នៅលើពិភពលោក កំពុងប្រឈមនឹងជំងឺខ្លាញ់រុំថ្លើម ដែលជាស្ថានភាពជាតិខ្លាញ់កកកុញលើសពី ៥ ទៅ ១០% នៃទម្ងន់ថ្លើម។ អ្វីដែលគួរឱ្យបារម្ភបំផុតនោះគឺ មនុស្សភាគច្រើនមិនបានដឹងខ្លួនថាខ្លួនឯងមានជំងឺនេះឡើយ រហូតទាល់តែវាឈានដល់ដំណាក់កាលធ្ងន់ធ្ងរ។
ខាងក្រោមនេះគឺជាអាហារប្រចាំថ្ងៃទាំង ៩ យ៉ាងដែលអ្នកគួរប្រុងប្រយ័ត្នបំផុត៖
អាហារដែលសម្បូរទៅដោយម្សៅសម្រិតសម្រាំងដូចជា នំបុ័ងស និង អាហារធ្វើពីម្សៅមី គឺជាមូលហេតុចម្បងដែលធ្វើឱ្យជាតិស្ករក្នុងឈាមឡើងខ្ពស់ភ្លាមៗ រុញច្រានឱ្យរាងកាយបំប្លែងជាតិស្ករលើសទៅជាខ្លាញ់ស្តុកទុកក្នុងថ្លើម។ បន្ថែមពីនេះ ភេសជ្ជៈផ្អែមៗ រួមមាន ទឹកក្រូចដប ភេសជ្ជៈប៉ូវកម្លាំង និងទឹកផ្លែឈើកំប៉ុង សុទ្ធតែផ្ទុកជាតិស្ករខ្ពស់ ដែលថ្លើមត្រូវធ្វើការធ្ងន់ដើម្បីរំលាយ ហើយវានឹងប្រែជារឹង និងក្លាយជាដំបៅថ្លើម (ក្រិនថ្លើម) ប្រសិនបើញ៉ាំច្រើនជ្រុល។ អាហារកញ្ចប់ និង អាហារបំពង ក៏ជាសត្រូវលាក់មុខដែរ ព្រោះវាសម្បូរទៅដោយខ្លាញ់ដែលថ្លើមពិបាកបំបែកខ្លាំងណាស់។
ចំពោះអ្នកនិយម សាច់ក្រហម និង សាច់កែច្នៃ ដូចជាសាច់ហ្សូស៊ីស ឬសាច់ជ្រូក៣ជាន់ អ្នកគួរដឹងថាវាសម្បូរខ្លាញ់ឆ្អែតដែលបង្កការរលាកថ្លើមយ៉ាងធ្ងន់ធ្ងរ។ សូម្បីតែ ផលិតផលទឹកដោះគោដែលមានជាតិខ្លាញ់ខ្ពស់ និង នំផ្អែមៗ ក៏រួមចំណែកធ្វើឱ្យថ្លើមរបស់អ្នក “ដកដង្ហើមមិនរួច” ដែរ។ ចុងក្រោយគឺ អាហាររហ័ស ដូចជាបឺហ្គ័រ និងភីហ្សា ដែលសម្បូរទៅដោយជាតិអំបិល ស្ករ និងខ្លាញ់មិនល្អ ដែលធ្វើឱ្យថ្លើមចុះខ្សោយ និងលើសទម្ងន់។
ដើម្បីការពារថ្លើមឱ្យនៅមានសុខភាពល្អ អ្នកគួរផ្លាស់ប្តូរមកញ៉ាំគ្រាប់ធញ្ញជាតិដែលមិនសម្រិតសម្រាំង ញ៉ាំប្រូតេអ៊ីនពីសាច់សត្វមិនជាប់ខ្លាញ់ ឬប្រូតេអ៊ីនពីរុក្ខជាតិវិញ។ ការកាត់បន្ថយអាហារទាំង ៩ មុខខាងលើ មិនត្រឹមតែជួយការពារថ្លើមមិនឱ្យឡើងខ្លាញ់ប៉ុណ្ណោះទេ ប៉ុន្តែថែមទាំងជួយឱ្យរាងកាយទាំងមូលស្រឡះ និងជៀសផុតពីជំងឺរ៉ាំរ៉ៃដទៃទៀតផងដែរ៕