​កុំឱ្យឆ្ងាញ់ក្លាយជាទុក្ខ! ប្រយ័ត្ន​អាហារទាំង ១០ ងាយបង្កការពុល និងរាករូសខ្លាំងក្នុងរដូវក្ដៅ

យោងតាមការចុះផ្សាយពីប្រភពបរទេស ក្នុងអំឡុងពេលដែលអាកាសធាតុបន្តកម្ដៅខ្លាំង មេរោគក្នុងអាហារអាចរីកសាយភាយយ៉ាងរហ័ស ដែលបង្កឱ្យអាហារងាយផ្អូម ឬខូចគុណភាព។

បើតាមទិន្នន័យវេជ្ជសាស្ត្រ ករណីពុលអាហារច្រើនតែកើតមានខ្ពស់លើក្រុមមនុស្សវ័យក្មេង និងវ័យធ្វើការ ដោយសារការទទួលទានអាហារនៅខាងក្រៅផ្ទះ ឬអាហារដែលចម្អិនមិនបានល្អ។ ជំងឺពុលអាហារកើតឡើងដោយសារការញ៉ាំអាហារ ឬទឹកដែលមានមេរោគបាក់តេរី វីរុស ឬសារធាតុគីមី ជាពិសេសអាហារដែលចម្អិនឆៅៗ ឬអាហារដែលទុកចោលយូរដោយមិនបានកម្ដៅឡើងវិញ។

អាហារដែលមានហានិភ័យខ្ពស់បំផុតចំនួន ១០ ប្រភេទដែលអ្នកគួរប្រុងប្រយ័ត្នរួមមាន ភ្លាសាច់គោឬសាច់ឆៅ ញាំបង្គាលោត ញាំលៀសសមុទ្រឬគ្រឿងសមុទ្រឆៅ បាយឆាដែលរោយសាច់ក្ដាមពីលើ អាហារឬបង្អែមដែលមានខ្ទិះដូងស្រស់ នំបញ្ចុក បាយមាន់ បុកល្ហុង សាឡាត់បន្លែស្រស់ និងទឹកកកដែលផលិតមិនមានស្ដង់ដាអនាម័យ។ អាហារទាំងនេះងាយនឹងឆ្លងមេរោគបំផុត ប្រសិនបើការរៀបចំ និងការរក្សាទុកមិនមានអនាម័យត្រឹមត្រូវ។

ដើម្បីញ៉ាំអាហារដោយសុវត្ថិភាព អ្នកគួរប្រកាន់ខ្ជាប់នូវគោលការណ៍ “ឆ្អិន ស្អាត និងស្រស់” ដោយជ្រើសរើសញ៉ាំតែអាហារដែលទើបចម្អិនឆ្អិនថ្មីៗ ឬប្រសិនបើជាអាហារកញ្ចប់ត្រូវកម្ដៅឱ្យក្ដៅខ្លាំងមុននឹងញ៉ាំ។ ចំពោះគ្រឿងសមុទ្រ សាច់សត្វ និងស៊ុត ត្រូវចម្អិនឱ្យឆ្អិនល្អជានិច្ច ចៀសវាងការញ៉ាំឆៅឬកន្លះឆៅ។ បន្ថែមពីនេះ ត្រូវលាងដៃឱ្យស្អាតជានិច្ចមុនពេលញ៉ាំអាហារ និងក្រោយពេលចេញពីបន្ទប់ទឹក រួមទាំងប្រើស្លាបព្រាកណ្ដាលជានិច្ចនៅពេលញ៉ាំជុំគ្នាជាមួយអ្នកដទៃ។ ប្រសិនបើអ្នកសង្កេតឃើញអាហារមានក្លិន ពណ៌ ឬរសជាតិប្លែកខុសពីធម្មតា ត្រូវបោះចោលភ្លាមដោយមិនត្រូវស្ដាយឡើយ។

ក្នុងករណីមានអាការៈពុលអាហារដូចជា ក្អួត ចុកពោះ រាគខ្លាំង ឬមានគ្រុនក្ដៅ អ្នកគួរញ៉ាំទឹកលាយម្សៅអូរ៉ាសូល (ORS) ដើម្បីបង្គ្រប់ជាតិទឹកក្នុងរាងកាយ។ ប៉ុន្តែប្រសិនបើអាការៈមិនធូរស្បើយ នៅតែបន្តរាកខ្លាំង ញ៉ាំអ្វីមិនចូល ឬបត់ជើងមានឈាមលាយឡំ ត្រូវប្រញាប់ទៅជួបគ្រូពេទ្យនៅមន្ទីរពេទ្យដែលនៅជិតបំផុតជាបន្ទាន់ ដើម្បីការពារគ្រោះថ្នាក់ដល់ជីវិតដោយសារការបាត់បង់ជាតិទឹកខ្លាំង ឬការឆ្លងមេរោគចូលក្នុងចរន្តឈាម៕