យោងតាមការចុះផ្សាយពីប្រភពបរទេស ការជ្រើសរើសពេលវេលាហាត់ប្រាណឱ្យបានត្រឹមត្រូវគឺជាគន្លឹះសំខាន់ដែលជួយឱ្យអ្នកទទួលបានលទ្ធផលទ្វេដងសម្រាប់សុខភាពនិងរាងកាយ។
ការហាត់ប្រាណនៅពេលព្រឹកព្រលឹមផ្តល់អត្ថប្រយោជន៍ខ្លាំងសម្រាប់អ្នកដែលចង់សម្រកទម្ងន់ ព្រោះវាជួយដុតរំលាយជាតិខ្លាញ់បានល្អ និងធ្វើឱ្យរាងកាយស្រស់ស្រាយត្រៀមលក្ខណៈសម្រាប់ចាប់ផ្ដើមថ្ងៃថ្មីដោយស្មារតីវៃឆ្លាត។ លើសពីនេះ ការហាត់ពេលព្រឹកងាយនឹងបង្កើតជាទម្លាប់ប្រចាំថ្ងៃបានល្អជាងពេលល្ងាច ដោយសារមិនសូវមានធុរៈរវល់មកកាត់ចង្វាក់ ហើយវាក៏ជួយឱ្យអ្នកអាចគេងលក់បានស្កប់ស្កល់នៅពេលយប់ផងដែរ។
ដោយឡែក ការហាត់ប្រាណនៅពេលល្ងាចវិញ ស័ក្តិសមបំផុតសម្រាប់អ្នកដែលចង់ពង្រឹងកម្លាំងនិងស្ថាបនាសាច់ដុំឱ្យរឹងមាំ។ ចន្លោះម៉ោង ៤ ទៅ ៥ ល្ងាច ជាពេលវេលាដែលរាងកាយអាចដុតរំលាយថាមពលបានខ្ពស់បំផុត ហើយសាច់ដុំក៏មានភាពអំណត់និងយឺតយារបានល្អជាងពេលព្រឹក ដែលអនុញ្ញាតឱ្យអ្នកហាត់បានធ្ងន់និងប្រើកម្លាំងបានពេញទំហឹង។ អត្ថប្រយោជន៍ម្យ៉ាងទៀតនៃការហាត់ពេលល្ងាចគឺការកាត់បន្ថយហានិភ័យនៃរបួសសាច់ដុំ ដោយសាររាងកាយបានធ្វើចលនាមកពេញមួយថ្ងៃរួចជាស្រេច ប៉ុន្តែអ្នកគួរចងចាំថាត្រូវហាត់ឱ្យបាន ៤ ទៅ ៦ ម៉ោងមុនពេលចូលគេង ដើម្បីកុំឱ្យប៉ះពាល់ដល់ដំណេក។
ជារួមមក ទោះបីជាអ្នកជ្រើសរើសហាត់នៅពេលណាក៏ដោយ អ្វីដែលសំខាន់បំផុតគឺការរក្សានិរន្តរភាពដោយហាត់ឱ្យបានយ៉ាងតិច ៣ ទៅ ៤ ថ្ងៃក្នុងមួយសប្តាហ៍ និងចំណាយពេលយ៉ាងតិច ៣០ នាទីក្នុងមួយលើកៗ។ ការធ្វើបែបនេះមិនត្រឹមតែជួយឱ្យអ្នកមានរាងស្អាតតាមបំណងប៉ុណ្ណោះទេ ប៉ុន្តែថែមទាំងជួយពង្រឹងប្រព័ន្ធការពាររាងកាយឱ្យមាំមួន និងជៀសឆ្ងាយពីជំងឺដង្កាត់ផ្សេងៗបានយ៉ាងប្រសើរក្នុងរយៈពេលវែង៕