ក្នុងសម័យកាលដ៏មមាញឹកនេះ មនុស្សភាគច្រើនតែងតែរុញច្រានខ្លួនឯងឱ្យធ្វើការហួសកម្លាំង រហូតភ្លេចស្តាប់ សម្លេងចេញពីក្នុងរាងកាយ ។ ការសម្រាកមិនមែនជាការខ្ជិលច្រអូសនោះទេ ប៉ុន្តែវាគឺជាការបញ្ចូលថាមពល ដើម្បីបន្តដំណើរទៅមុខទៀត ។
សិនបើអ្នកមានសញ្ញាទាំង ៥ នេះ មានន័យថារាងកាយរបស់អ្នកកំពុងដល់ចំណុចក្រហមហើយ ៖
១. អស់កម្លាំងរ៉ាំរ៉ៃ ទោះបីជាគេងច្រើនក៏ដោយ
តើអ្នកធ្លាប់មានអារម្មណ៍ថា ទោះបីជាគេងបាន ៨ ម៉ោងពេញក៏ដោយ ក៏នៅតែមានអារម្មណ៍ល្វើយ និងចង់គេងបន្តទៀតដែរឬទេ? នេះគឺជាសញ្ញាថា ប្រព័ន្ធប្រសាទ និងខួរក្បាលរបស់អ្នកកំពុងហត់នឿយខ្លាំង (Burnout)។ វាមិនមែនគ្រាន់តែជាការហត់សាច់ដុំឡើយ ប៉ុន្តែវាជាការអស់ថាមពលពីខាងក្នុងដែលការគេងធម្មតាមិនអាចជួសជុលបានភ្លាមៗ។
២. ប្រព័ន្ធស៊ាំចុះខ្សោយ (ឈឺបន្តិចបន្តួចមិនឈប់)
នៅពេលអ្នកស្ត្រេស ឬធ្វើការហួសកម្លាំង រាងកាយនឹងបញ្ចេញអរម៉ូនម្យ៉ាងឈ្មោះ Cortisol ច្រើនលើសលប់ ដែលវាទៅបង្ក្រាបប្រព័ន្ធការពាររាងកាយ។ ប្រសិនបើអ្នកចាប់ផ្តើម ផ្ដាសាយញឹកញាប់ ឈឺបំពង់ក ឬឈឺក្បាលតិចៗជារៀងរាល់ថ្ងៃ នោះជារបាំងការពាររបស់អ្នកកំពុងធ្លុះធ្លាយហើយ។
៣. ឆាប់ខឹង និងអារម្មណ៍ប្រែប្រួលខ្លាំង
ការហត់នឿយខ្លាំងធ្វើឱ្យសមត្ថភាពក្នុងការគ្រប់គ្រងអារម្មណ៍ចុះថយ។ រឿងតូចតាចដែលធ្លាប់តែអត់ឱនបាន បែរជាធ្វើឱ្យអ្នកមួរម៉ៅ ឆាប់ខឹង ឬចង់យំដោយគ្មានមូលហេតុ។ នេះជាសញ្ញាថា ខួរក្បាលរបស់អ្នកត្រូវការ “បិទ” (Shut down) ដើម្បីរៀបចំសណ្តាប់ធ្នាប់អារម្មណ៍ឡើងវិញ។
៤. គេងមិនលក់ ឬយល់សប្តិឃើញតែរឿងការងារ
វាជារឿងចម្លែកដែល “រាងកាយហត់ខ្លាំង តែភ្នែកបិទមិនជិត”។ បាតុភូតនេះកើតឡើងដោយសារប្រព័ន្ធប្រសាទរបស់អ្នកនៅមានសកម្មភាពខ្លាំងពេក (Overactive)។ ទោះបីជាអ្នកគេងលក់ ក៏ខួរក្បាលនៅតែបន្តគិតពីបញ្ហាការងារ ឬរឿងដែលមិនទាន់ដោះស្រាយ រហូតធ្វើឱ្យអ្នកភ្ញាក់មកវិញទាំងអារម្មណ៍មិនស្រឡះ។
៥. បាត់បង់ការផ្ដោតអារម្មណ៍ និងការចងចាំ
តើអ្នកធ្លាប់ដើរទៅផ្ទះបាយ រួចភ្លេចថាខ្លួនឯងចង់ទៅយកអ្វីដែរឬទេ? ឬអានឯកសារដដែលៗជាច្រើនដងតែមិនយល់? នៅពេលរាងកាយត្រូវការសម្រាក សមត្ថភាពក្នុងការចងចាំ និងការសម្រេចចិត្តនឹងធ្លាក់ចុះ។ ខួរក្បាលដែលហត់នឿយ មិនអាចដំណើរការព័ត៌មានបានលឿនដូចមុនឡើយ។
ដំណោះស្រាយងាយៗ៖
-ច្បាប់ ១៥ នាទី៖ ឈប់សម្រាកពីមុខកុំព្យូទ័រ ឬទូរស័ព្ទ រៀងរាល់ ២ ម៉ោងម្តង។
-ការដកដង្ហើម៖ អនុវត្តការដកដង្ហើមវែងៗ ៥-១០ ដង នៅពេលមានអារម្មណ៍តឹងតែង។
-ការដើរកម្សាន្ត៖ ដើរលំហែក្នុងសួនច្បារ ឬកន្លែងដែលមានធម្មជាតិ ដើម្បីឱ្យខួរក្បាលបានធូរស្រាល។
ការងារអាចរង់ចាំបាន ប៉ុន្តែសុខភាពរបស់អ្នកមិនអាចរង់ចាំបានឡើយ។ បើគ្មាន “អ្នក” តើការងារទាំងនោះមានន័យអ្វី? សម្រាកខ្លះទៅ រាងកាយរបស់អ្នកនឹងអរគុណអ្នកនៅថ្ងៃស្អែក!