យោងតាមការចុះផ្សាយពីប្រភពបរទេស មនុស្សជាច្រើនមានទម្លាប់ដេកផ្កាប់ព្រោះមានអារម្មណ៍ថាស្រួលខ្លួន ប៉ុន្តែបើតាមការព្រមានពីគ្រូពេទ្យជំនាញផ្នែកប្រព័ន្ធទឹកនោម ទម្លាប់នេះអាចបង្កផលវិបាកយ៉ាងធ្ងន់ធ្ងរដល់សុខភាពផ្លូវភេទ និងសមត្ថភាពរបស់បុរសដោយមិនដឹងខ្លួន។
ទោះបីជាការដេកផ្កាប់មិនបានបំផ្លាញមេជីវិតដោយផ្ទាល់ភ្លាមៗមែន ប៉ុន្តែវាបង្កើតសម្ពាធដល់រាងកាយក្នុងរយៈពេលវែង ដែលប៉ះពាល់ដល់ចរន្តឈាម និងមុខងារសំខាន់ៗនៃប្រព័ន្ធបន្តពូជ។ មូលហេតុដែលការ “ដេកផ្កាប់” ផ្ដល់ផលអាក្រក់ខ្លាំងចំពោះបុរស គឺដោយសារតែវបង្កឱ្យមានការសង្កត់ជប់ទៅលើតំបន់ពោះ និងអវយវៈភេទជាច្រើនម៉ោង ដែលធ្វើឱ្យចរន្តឈាមរត់មិនបានស្រួល។ អ្វីដែលកាន់តែសំខាន់នោះគឺ ធម្មជាតិរបស់បុរសតែងតែមានការរំញោចរឹងខ្លួននៅពេលយប់ ប្រសិនបើអ្នកដេកផ្កាប់ វានឹងធ្វើឱ្យអវយវៈភេទត្រូវសង្កត់ជាប់ជាមួយពូក បណ្ដាលឱ្យអ្នកមានអារម្មណ៍មិនស្រួលខ្លួន និងដេកមិនលក់ស្កប់ស្កល់។ នៅពេលដែលដំណេកត្រូវបានរំខាន រាងកាយក៏មិនអាចផលិតអ័រម៉ូនតេស្តូស្តេរ៉ូនបានពេញលេញដែរ ដែលនាំឱ្យថយចុះនូវចំណង់ និងសមត្ថភាពផ្លូវភេទ។
ក្រៅពីបញ្ហាអ័រម៉ូន ការដេកផ្កាប់ក៏ប៉ះពាល់ដល់ “គុណភាពមេជីវិត” ផងដែរ ព្រោះពងស្វាសត្រូវការសីតុណ្ហភាពទាបជាងសីតុណ្ហភាពរាងកាយបន្តិចដើម្បីផលិតមេជីវិតឱ្យមានប្រសិទ្ធភាព។ ការដេកផ្កាប់សង្កត់យូរធ្វើឱ្យតំបន់នោះឡើងកម្ដៅខ្លាំង និងហប់ខ្យល់ ដែលក្នុងរយៈពេលវែងអាចធ្វើឱ្យចំនួន និងគុណភាពមេជីវិតធ្លាក់ចុះ។ អ្នកជំនាញបានណែនាំថា “ការដេកផ្អៀង” គឺជាជម្រើសដ៏ល្អបំផុតសម្រាប់បុរស ព្រោះវាជួយកាត់បន្ថយសម្ពាធសង្កត់ និងទុកលំហឱ្យអវយវៈភេទស្ថិតក្នុងលក្ខណៈធម្មជាតិ ជួយឱ្យដកដង្ហើមស្រួល និងដេកលក់បានជ្រៅ។
ប្រសិនបើអ្នកសង្កេតឃើញថាមានបញ្ហាសមត្ថភាពផ្លូវភេទចុះខ្សោយជាប់ៗគ្នាលើសពី ៣ ខែ អ្នកគួរតែទៅពិគ្រោះជាមួយគ្រូពេទ្យជំនាញ។ ប៉ុន្តែមុននឹងឈានដល់ដំណាក់កាលនោះ ការចាប់ផ្ដើមកែប្រែទម្លាប់ដេកមកដេកផ្អៀង ឬដេកផ្ងារវិញ រួមផ្សំជាមួយការហាត់ប្រាណឱ្យបានទៀងទាត់ គឺជាវិធីសាស្ត្រដ៏សាមញ្ញបំផុតក្នុងការស្ដារប្រព័ន្ធចរន្តឈាម និងពង្រឹងសុខភាពផ្លូវភេទឱ្យរឹងមាំឡើងវិញ៕