យោងតាមការចុះផ្សាយពីប្រភពបរទេស ការសម្រកទម្ងន់ដោយញ៉ាំតែពងទាស្ងោរគឺជាវិធីសាស្ត្រដែលជួយឱ្យស្រកទម្ងន់បានយ៉ាងរហ័សក្នុងរយៈពេលខ្លី ប៉ុន្តែវាបង្កផលប៉ះពាល់អវិជ្ជមានដល់សុខភាពយ៉ាងធ្ងន់ធ្ងរ ប្រសិនបើអ្នកមិនបានយល់ដឹងពីតុល្យភាពអាហារូបត្ថម្ភឱ្យបានត្រឹមត្រូវ។
របបអាហារនេះតម្រូវឱ្យញ៉ាំពងទាស្ងោរយ៉ាងតិច ២ ទៅ ៣ គ្រាប់ក្នុងមួយថ្ងៃ ដោយកាត់បន្ថយជាតិម្សៅឱ្យនៅទាបបំផុត ដែលនាំឱ្យរាងកាយខ្វះខាតសារធាតុចិញ្ចឹមចាំបាច់ជាច្រើនមុខ ជាពិសេសគឺជាតិសរសៃដែលនាំឱ្យមានបញ្ហាទល់លាមក និងបង្កើនការរលាកក្នុងរាងកាយយ៉ាងងាយស្រួល។
ទោះបីជាពងទាស្ងោរមួយគ្រាប់សម្បូរដោយប្រូតេអ៊ីនគុណភាពខ្ពស់ វីតាមីនឌី និងសារធាតុដែលជួយដល់ការចងចាំក៏ដោយ ប៉ុន្តែការញ៉ាំច្រើនហួសកម្រិតអាចធ្វើឱ្យរាងកាយទទួលបានជាតិខ្លាញ់ឆ្អែតខ្ពស់ ដែលបង្កើនកម្រិតកូឡេស្តេរ៉ុលអាក្រក់ និងប្រឈមនឹងជំងឺបេះដូង។ ដើម្បីសម្រកទម្ងន់ឱ្យមានសុវត្ថិភាព និងនិរន្តរភាព អ្នកមិនគួរញ៉ាំតែពងទាស្ងោរទទេនោះទេ ប៉ុន្តែត្រូវចេះ “ចាប់គូ” ជាមួយអាហារផ្សេងៗដើម្បីឱ្យមានតុល្យភាព ដូចជាការញ៉ាំជាមួយគ្រាប់ធញ្ញជាតិ និងម្សៅមានប្រយោជន៍ពីស្រូវសាលី ឬដំឡូងជ្វា ដើម្បីផ្ដល់ថាមពលដល់រាងកាយ។ ជាមួយគ្នានេះ ការបន្ថែមបន្លែ និងផ្លែឈើចម្រុះឱ្យបានច្រើនមុខគឺជាកត្តាចាំបាច់ដើម្បីទទួលបានវីតាមីន និងការពារការទល់លាមក រួមទាំងការជ្រើសរើសប្រូតេអ៊ីនខ្លាញ់ទាបផ្សេងទៀតដូចជា សាច់មាន់ ឬត្រី ដើម្បីកុំឱ្យរាងកាយខ្វះសារធាតុចិញ្ចឹម។
ក្រៅពីការកែសម្រួលរបបអាហារ ការធ្វើលំហាត់ប្រាណឱ្យត្រូវក្បួនក៏ជាផ្នែកមួយមិនអាចខ្វះបានក្នុងដំណើរការសម្រកទម្ងន់ប្រកបដោយសុខភាពមាំមួន។ អ្នកគួររួមបញ្ចូលការហាត់ប្រាណបែបពង្រឹងសាច់ដុំ ដើម្បីរក្សាម៉ាសសាច់ដុំដែលតែងតែបាត់បង់ទៅតាមអាយុ និងការហាត់បែបកីឡាផ្សេងៗដូចជា ការហែលទឹក ឬការដើរឱ្យបានលឿនជារៀងរាល់ថ្ងៃ ដើម្បីជួយដុតរំលាយជាតិខ្លាញ់ និងពង្រឹងសុខភាពបេះដូង។
ជារួមមក របបអាហារពងទាស្ងោរអាចជួយឱ្យអ្នកស្រកគីឡូបានលឿនមែន ប៉ុន្តែវាមិនអាចអនុវត្តបានយូរអង្វែងឡើយ ហើយថែមទាំងអាចបំផ្លាញសុខភាពរបស់អ្នកទៀតផង។ វិធីសាស្ត្រដែលល្អបំផុតគឺការញ៉ាំអាហារឱ្យគ្រប់ ៥ ក្រុមក្នុងបរិមាណសមល្មម រួមផ្សំជាមួយខ្លាញ់ល្អពីផ្លែបឺរ ឬគ្រាប់ធញ្ញជាតិ និងការធ្វើលំហាត់ប្រាណឱ្យបានទៀងទាត់ ទើបជាគន្លឹះពិតប្រាកដដែលជួយឱ្យអ្នកទទួលបានរាងស្លីមស្អាត និងសុខភាពរឹងមាំក្នុងរយៈពេលវែង៕