យោងតាមការចុះផ្សាយពីប្រភពបរទេស បញ្ហាស្នាមឈាមជាប់កម្រាលពូក មិនថាបង្កឡើងដោយរបួសបន្តិចបន្តួច ឈាមច្រមុះ ឬការមកឈាមរដូវនោះទេ វាតែងតែជាការរំខានចិត្តខ្លាំង ប្រសិនបើទុកឱ្យវាក្រៀមជាប់សាច់ក្រណាត់យូរ។
មូលហេតុដែលធ្វើឱ្យស្នាមឈាមពិបាកបោកជម្រះ គឺដោយសារឈាមមានផ្ទុកជាតិប្រូតេអ៊ីន ដែលកកក្ដាំងជាប់សរសៃសូត្រកាន់តែខ្លាំងនៅពេលប៉ះនឹងកម្ដៅ។ ដូច្នេះ វិធានការដំបូងបង្អស់គឺ “ហាមប្រើទឹកក្ដៅ” មកលាងសម្អាតស្នាមឈាមជាដាច់ខាត ព្រោះវានឹងធ្វើឱ្យស្នាមនោះជាប់រឹងបោកមិនចេញជារៀងរហូត។
ដើម្បីកម្ចាត់ស្នាមឈាមឱ្យមានប្រសិទ្ធភាព អ្នកអាចអនុវត្តតាមវិធីសាស្ត្រងាយៗតាមកម្រិតនៃស្នាមប្រឡាក់ដូចខាងក្រោម៖
សម្រាប់ការប្រឡាក់ថ្មីៗ អ្នកគ្រាន់តែប្រើ ទឹកត្រជាក់ មកលាងជម្រះភ្លាមៗ រួចដុសជាមួយសាប៊ូដុំ ឬទឹកសាប៊ូបោកខោអាវ ហើយត្រាំទុកប្រហែល ១៥ ទៅ ៣០ នាទី មុននឹងយកទៅបោកតាមធម្មតា។ ប្រសិនបើស្នាមនោះចាប់ផ្ដើមក្រៀមជាប់ អ្នកអាចប្រើ អំបិល លាយជាមួយទឹកត្រជាក់បន្តិច រួចយកទៅលាបពីលើស្នាមឈាមនោះទុកចោល ៣០ នាទី វានឹងជួយទាញយកជាតិពណ៌ឈាមចេញពីសរសៃក្រណាត់បានយ៉ាងល្អ។
ចំពោះស្នាមឈាមដែលដិតណែនខ្លាំង និងទុកចោលយូរ ការប្រើ ម្សៅបេកឃីងសូដា គឺជាជម្រើសដ៏ល្អប្រសើរ។ អ្នកគ្រាន់តែយកម្សៅបេកឃីងសូដាលាយជាមួយទឹកបន្តិចឱ្យខាប់ដូចគ្រីម រួចយកទៅលាបពីលើស្នាមប្រឡាក់ទុកចោលពី ៣០ ទៅ ៦០ នាទី បន្ទាប់មកលាងចេញដោយទឹកត្រជាក់។ ម្យ៉ាងវិញទៀត សម្រាប់កម្រាលពូកពណ៌ស ឬពណ៌ខ្ចី អ្នកអាចប្រើ ទឹកអ៊ីដ្រូសែនពែរអុកស៊ីត បន្តក់ពីលើស្នាមឈាម រង់ចាំឱ្យវាចេញពពុះដើម្បីរំលាយជាតិឈាម រួចយកក្រណាត់ស្អាតមកជូតជម្រះចេញជាការស្រេច។
ចំណុចសំខាន់ដែលអ្នកត្រូវចងចាំគឺ ត្រូវប្រើទឹកត្រជាក់ជានិច្ច និងជៀសវាងការអ៊ុតកម្រាលពូក ប្រសិនបើស្នាមឈាមមិនទាន់ជ្រះស្អាត ១០០% ព្រោះកម្ដៅអ៊ុតនឹងធ្វើឱ្យស្នាមនោះជាប់ងាប់លើក្រណាត់។ ការប្រញាប់ប្រញាល់ចាត់វិធានការភ្លាមៗ រួមផ្សំនឹងការប្រើប្រាស់របស់ប្រើប្រាស់ក្នុងផ្ទះដូចជា អំបិល ឬបេកឃីងសូដា នឹងជួយឱ្យកម្រាលពូករបស់អ្នកត្រឡប់មកស្អាតដូចថ្មី ដោយមិនចាំបាច់ហត់នឿយបោកដុសខ្លាំង ឬត្រូវបោះចោលនោះឡើយ៕