យោងតាមការចុះផ្សាយពីប្រភពបរទេស បញ្ហាក្លិនស្អុយនៅក្នុងទូស្បែកជើង គឺជាការរំខានផ្លូវចិត្ត និងធ្វើឱ្យបាត់បង់ទំនុកចិត្តយ៉ាងខ្លាំង។ ក្លិនទាំងនេះកើតឡើងដោយសារបាក់តេរី និងផ្សិតរីករាលដាលនៅពេលស្បែកជើងមានសំណើម ឬជោគទឹក ហើយត្រូវបានរក្សាទុកក្នុងទីកន្លែងដែលគ្មានខ្យល់ចេញចូលល្អ។
ដើម្បីដោះស្រាយបញ្ហានេះ អ្នកអាចប្រើប្រាស់របស់សាមញ្ញៗដែលមានស្រាប់នៅក្នុងផ្ទះបាយ ឬក្នុងផ្ទះមកធ្វើជាជំនួយការ៖
ការប្រើ ម្សៅបេកឃីងសូដា គឺជាវិធីដ៏ល្អបំផុត ដោយគ្រាន់តែដួសដាក់ក្នុងកញ្ចប់ក្រណាត់តូចៗដាក់ក្នុងទូ ឬរោយចូលក្នុងស្បែកជើងទុកមួយយប់ វានឹងជួយបឺតយកក្លិនមិនល្អ និងសំណើមចេញទាំងអស់។ ចំណែក ធ្យូងអនាម័យ ក៏មានសមត្ថភាពអស្ចារ្យក្នុងការបឺតស្រូបក្លិនផ្អួរបែបធម្មជាតិផងដែរ គ្រាន់តែដាក់ធ្យូងពីរបីដុំក្នុងទូស្បែកជើងជាការស្រេច។
សម្រាប់ស្បែកជើងដែលទើបពាក់រួច អ្នកមិនគួរដាក់ចូលក្នុងទូភ្លាមៗឡើយ ផ្ទុយទៅវិញគួរយកវាទៅហាលថ្ងៃ ឬដាក់មុខកង្ហារឱ្យស្ងួតសិន។ ការប្រើ ក្រដាសកាសែត ញាត់ចូលក្នុងស្បែកជើង ក៏ជួយបឺតសំណើមឱ្យស្ងួតលឿន និងកាត់បន្ថយក្លិនបានមួយកម្រិតធំ។ បន្ថែមពីនេះ ការបាញ់ អាល់កុល បន្តិចបន្តួចនៅផ្នែកខាងក្នុងស្បែកជើង នឹងជួយសម្លាប់បាក់តេរីដែលជាប្រភពនៃក្លិនអាក្រក់បានយ៉ាងរហ័ស។
ដើម្បីការពារកុំឱ្យមានក្លិនអាប់ក្នុងរយៈពេលវែង អ្នកគួរជៀសវាងការពាក់ស្បែកជើងដដែលៗរាល់ថ្ងៃ ដើម្បីទុកពេលឱ្យវាបានបញ្ចេញសំណើមចេញខ្លះ។ ការសម្អាតទូស្បែកជើងឱ្យបានទៀងទាត់ និងការដាក់កញ្ចប់បឺតសំណើមបន្ថែម នឹងជួយឱ្យស្បែកជើងរបស់អ្នករក្សាបាននូវភាពស្រស់ស្រាយ និងបង្កើនទំនុកចិត្តរាល់ពេលឈានជើងចេញក្រៅ ទោះបីជាត្រូវជួបអាកាសធាតុសើមធ្លាក់ភ្លៀងយ៉ាងណាក៏ដោយ៕