យោងតាមការចុះផ្សាយពីប្រភពបរទេស អាការៈរួយក ចុកស្មា និងតឹងបោះដៃ គឺជាបញ្ហាយ៉ាងពេញនិយមសម្រាប់អ្នកធ្វើការការិយាល័យ ឬអ្នកដែលចូលចិត្តឱនមើលទូរស័ព្ទយូរៗ។ បញ្ហានេះបង្កឡើងដោយសាច់ដុំឡើងរឹង និងឈាមរត់មិនបានស្រួល ប៉ុន្តែអ្នកអាចដោះស្រាយវាបានយ៉ាងងាយស្រួលដោយចំណាយពេលត្រឹមតែ ៣ នាទីប៉ុណ្ណោះនៅមុខតុធ្វើការរបស់អ្នក។
វិធីសាស្ត្រដំបូងគឺ “ការទាញក” ដោយគ្រាន់តែអង្គុយខ្លួនត្រង់ រួចផ្អៀងក្បាលទៅម្ខាង ហើយប្រើដៃសង្កត់ស្រាលៗដកដង្ហើមវែងៗរយៈពេល ១៥ វិនាទី រួចផ្លាស់ប្តូរទៅម្ខាងទៀត ដើម្បីជួយកាត់បន្ថយភាពតានតឹងនៃសាច់ដុំកភ្លាមៗ។ បន្ទាប់មក អ្នកគួរចំណាយពេល ១ នាទីទៀតក្នុង “ការបង្វិលស្មា” យឺតៗទៅខាងក្រោយ និងមកខាងមុខវិញ ដើម្បីជួយជំរុញចរន្តឈាមឱ្យរត់បានល្អ និងកាត់បន្ថយភាពរួយស្រពន់នៅតំបន់ស្មា។
ជំហានដ៏សំខាន់មួយទៀតគឺ “ការប្រណម្យដៃទៅក្រោយ” ដោយយារដៃទាំងពីរទៅក្រោយខ្នង រួចទាញទ្រូងមកមុខឱ្យអស់ ហើយងើបមុខឡើងបន្តិចរយៈពេល ១ នាទី ដែលវិធីនេះជួយកែសម្រួលឥរិយាបថដែលធ្លាប់តែអង្គុយគមឱ្យត្រង់មកវិញ និងកាត់បន្ថយការឈឺចាប់ឆ្អឹងខ្នងផ្នែកខាងលើ។ ជាចុងក្រោយ គឺការ “លើកស្មាឡើងលើ” ឱ្យខ្ពស់បំផុត រួចទម្លាក់ចុះមកវិញឱ្យលឿនរយៈពេល ៣០ វិនាទី ដើម្បីបញ្ចេញជាតិអាស៊ីតដែលធ្វើឱ្យសាច់ដុំរឹងឱ្យធូរស្រាលមកវិញ។
ក្រៅពីការហាត់ប្រាណខ្លីៗនេះ អ្នកក៏គួរកែប្រែទម្លាប់ខ្លះៗដូចជា ការដាក់អេក្រង់កុំព្យូទ័រឱ្យស្មើនឹងកម្រិតភ្នែក ការអង្គុយខ្លួនត្រង់មិនគមស្មា និងការក្រោកដើរចេញពីកន្លែងធ្វើការរៀងរាល់ ១ ម៉ោងម្ដង។ ការចំណាយពេលត្រឹមតែ ៣ នាទីក្នុងមួយថ្ងៃដើម្បីធ្វើចលនាទាំងនេះ មិនត្រឹមតែជួយឱ្យអ្នកបាត់រួយស្មានោះទេ ប៉ុន្តែថែមទាំងជួយការពារបញ្ហាឈឺក្បាលដែលបណ្ដាលមកពីសាច់ដុំឡើងរឹង និងបង្កើនប្រសិទ្ធភាពការងាររបស់អ្នកឱ្យកាន់តែស្រស់ថ្លាជានិច្ច៕