យោងតាមការចុះផ្សាយពីប្រភពបរទេស ទឹកដោះគោជូរគឺជាអាហារដែលយើងស្គាល់គ្រប់គ្នា ប៉ុន្តែមិនមែនគ្រប់គ្នាសុទ្ធតែដឹងពីពេលវេលាមាសក្នុងការញ៉ាំដើម្បីទទួលបានអត្ថប្រយោជន៍ខ្ពស់បំផុតនោះទេ។ អ្នកជំនាញបានបង្ហើបថា ការញ៉ាំទឹកដោះគោជូរប្រភេទខ្លាញ់ទាប និងស្ករតិច បរិមាណពី ១៥០ ទៅ ២០០ ក្រាម នៅរយៈពេល ៣០ នាទីមុនពេលញ៉ាំបាយ នឹងផ្ដល់លទ្ធផលអស្ចារ្យដែលអ្នកនឹកស្មានមិនដល់ចំពោះសុខភាពរាងកាយទាំងមូល។
មូលហេតុដែលការញ៉ាំមុនពេលបាយផ្ដល់ផលល្អខ្លាំង គឺដោយសារវាជួយកាត់បន្ថយការស្រូបយកជាតិស្ករពីអាហារដែលយើងញ៉ាំចូលទៅ ធ្វើឱ្យកម្រិតជាតិស្ករក្នុងឈាមមិនឡើងខ្ពស់ពេកក្រោយពេលបាយ ដែលជាគន្លឹះសំខាន់បំផុតសម្រាប់អ្នកចង់បង្ការជំងឺទឹកនោមផ្អែម។ ជាតិអាស៊ីតឡាក់ទិកនៅក្នុងទឹកដោះគោជូរ ធ្វើឱ្យអាហារចាកចេញពីក្រពះយឺតជាងមុន ជួយឱ្យអ្នកមានអារម្មណ៍ថាឆ្អែតបានយូរ ដែលជួយកាត់បន្ថយការញ៉ាំច្រើនហួសកម្រិតក្នុងបាយចម្បង និងជួយដុតរំលាយជាតិខ្លាញ់បានយ៉ាងមានប្រសិទ្ធភាព។ លើសពីនេះ វានៅជួយបង្កើនកោសិកាភាពស៊ាំការពាររាងកាយពីមេរោគក្នុងប្រព័ន្ធដង្ហើម និងកាត់បន្ថយការរលាកផ្សេងៗដែលប៉ះពាល់ដល់សុខភាពបេះដូងថែមទៀតផង។
អ្វីដែលពិសេសបំផុតសម្រាប់អ្នកដែលស្រឡាញ់សម្រស់ គឺប្រសិទ្ធភាពពន្យារភាពចាស់ដែលកើតចេញពីការគ្រប់គ្រងជាតិស្ករបានល្អ ព្រោះវានឹងជួយទប់ស្កាត់ដំណើរការដែលជាតិស្ករទៅតោងជាប់ប្រូតេអ៊ីន ដែលជាមូលហេតុចម្បងបង្កឱ្យស្បែកឆាប់ជ្រីវជ្រួញ យារធ្លាក់ និងខូចសរសៃឈាម។ ក្រៅពីការញ៉ាំមុនពេលបាយ អ្នកក៏អាចជ្រើសរើសពេលវេលាសមស្របផ្សេងទៀតដូចជាការញ៉ាំនៅពេលព្រឹកដើម្បីទទួលបានប្រូតេអ៊ីនចាប់ផ្ដើមថ្ងៃថ្មី ការញ៉ាំក្រោយបាយ ១ ទៅ ២ ម៉ោងដើម្បីជួយដល់ប្រព័ន្ធរំលាយអាហារ និងការញ៉ាំក្រោយពេលហាត់ប្រាណដើម្បីជួយជួសជុលសាច់ដុំ។ ជាពិសេសការញ៉ាំនៅចន្លោះម៉ោង ៨ ទៅ ៩ យប់ គឺជាពេលដែលរាងកាយស្រូបយកកាល់ស្យូមបានល្អបំផុតសម្រាប់ឆ្អឹង និងជួយឱ្យប្រព័ន្ធប្រសាទធូរស្រាល ធ្វើឱ្យគេងលក់បានស្កប់ស្កល់ និងកាត់បន្ថយភាពតានតឹងបានយ៉ាងប្រសើរ៕