យោងតាមការចុះផ្សាយពីប្រភពបរទេស អាការៈស្ងាបមិនអស់ ឬស្ងាបហើយនៅទាក់ៗកណ្តាលផ្លូវ គឺជាអារម្មណ៍មួយដែលយើងចង់ស្ងាបឱ្យអស់ពីមាត់តែធ្វើមិនបាន នាំឱ្យមានអារម្មណ៍តឹងណែនក្នុងទ្រូង ដកដង្ហើមមិនឆ្អែត និងបង្កជាការមួរម៉ៅក្នុងចិត្ត។ ទោះបីវាមិនមែនជាជំងឺកាចសាហាវ ប៉ុន្តែវាជារឿងរំខានដល់សេចក្ដីសុខក្នុងជីវិតប្រចាំថ្ងៃយ៉ាងខ្លាំង ដែលភាគច្រើនវាពាក់ព័ន្ធនឹងប្រព័ន្ធដកដង្ហើម និងប្រព័ន្ធប្រសាទ។
មូលហេតុចម្បងដែលនាំឱ្យស្ងាបមិនអស់ខ្យល់ រួមមានសម្ពាធផ្លូវចិត្ត និងភាពតានតឹង ដែលធ្វើឱ្យប្រព័ន្ធប្រសាទដំណើរការខុសប្រក្រតី នាំឱ្យការដកដង្ហើមមានសភាពរាក់ៗ និងមិនវែង។ ក្រៅពីនេះ វាក៏អាចបណ្ដាលមកពីទម្លាប់ដកដង្ហើមខុសបច្ចេកទេសដោយប្រើដើមទ្រូងខ្លាំងពេក បញ្ហាច្រាលទឹកអាស៊ីតក្រពះដែលធ្វើឱ្យរលាកបំពង់អាហារ និងប៉ះពាល់ដល់ការគ្រប់គ្រងដង្ហើម ឬអាការៈឈប់ដកដង្ហើមពេលគេងលក់ដែលធ្វើឱ្យរាងកាយខ្វះអុកស៊ីសែន។ កត្តាដទៃទៀតដូចជាការរស់នៅក្នុងមជ្ឈដ្ឋានដែលមានខ្យល់អាកាសមិនល្អ ការខ្វះជាតិទឹកក្នុងរាងកាយ ឬផលប៉ះពាល់ពីថ្នាំមួយចំនួន ក៏សុទ្ធតែជាដើមហេតុបង្កឱ្យមានអាការៈនេះដែរ។
ដើម្បីដោះស្រាយបញ្ហានេះ អ្នកគួរចាប់ផ្ដើមពីការគ្រប់គ្រងស្ត្រេស និងស្វែងរកសកម្មភាពដែលជួយឱ្យអារម្មណ៍ធូរស្រាល ព្រមទាំងគេងសម្រាកឱ្យបាន ៧ ទៅ ៩ ម៉ោងក្នុងមួយថ្ងៃ។ ការហ្វឹកហាត់ដកដង្ហើមវែងៗដោយប្រើសាច់ដុំពោះគឺមានសារៈសំខាន់ណាស់ ដោយអ្នកត្រូវព្យាយាមដកដង្ហើមចូលតាមច្រមុះយឺតៗឱ្យប៉ោងពោះ ហើយដកដង្ហើមចេញតាមមាត់វិញយឺតៗឱ្យផតពោះ ដើម្បីឱ្យសួតទទួលបានអុកស៊ីសែនពេញលេញ។ ក្រៅពីនេះ អ្នកគួរថែរក្សាសុខភាពទូទៅដោយញ៉ាំទឹកឱ្យបាន ៦ ទៅ ៨ កែវក្នុងមួយថ្ងៃ ហាត់ប្រាណឱ្យបានទៀងទាត់ កាត់បន្ថយភេសជ្ជៈដែលមានជាតិកាហ្វេអ៊ីន និងរស់នៅកន្លែងដែលមានខ្យល់អាកាសចេញចូលល្អ។
ប្រសិនបើអ្នកបានសាកល្បងកែប្រែទម្លាប់ខាងលើហើយ ប៉ុន្តែអាការៈនៅតែមិនធូរស្បើយ ឬមានអាការៈរួមផ្សំដូចជា ថប់ដង្ហើម ឈឺទ្រូង ឬមានបញ្ហាដំណេកធ្ងន់ធ្ងរ អ្នកគួរតែទៅពិគ្រោះជាមួយគ្រូពេទ្យជំនាញ ដើម្បីពិនិត្យរកមូលហេតុពិតប្រាកដ និងទទួលបានការព្យាបាលឱ្យចំគោលដៅ ដើម្បីឱ្យអ្នកអាចត្រឡប់មកដកដង្ហើមបានស្រឡះ និងមានផាសុកភាពឡើងវិញ៕