យោងតាមការចុះផ្សាយពីប្រភពបរទេស ក្លិនមាត់មិនត្រឹមតែធ្វើឱ្យយើងបាត់បង់ទំនុកចិត្ត និងប៉ះពាល់ដល់បុគ្គលិកលក្ខណៈប៉ុណ្ណោះទេ ប៉ុន្តែវាក៏ជា “សារ” ព្រមានពីបញ្ហាសុខភាពដែលកំពុងកើតឡើងក្នុងរាងកាយផងដែរ។ ការបែងចែកប្រភេទនៃក្លិនមាត់ឱ្យដឹងច្បាស់ នឹងជួយឱ្យយើងរកដំណោះស្រាយបានចំគោលដៅ និងទាន់ពេលវេលា។
ជាដំបូងគឺ ក្លិនមាត់ទូទៅ ដែលកើតឡើងក្នុងជីវិតប្រចាំថ្ងៃ និងមិនមែនជាជំងឺធ្ងន់ធ្ងរឡើយ ដូចជាក្លិនមាត់នៅពេលព្រឹកដែលបណ្ដាលមកពីទឹកមាត់ហូរតិចពេលគេង ធ្វើឱ្យបាក់តេរីលូតលាស់ខ្លាំង។ ក្រៅពីនេះ ក្លិនដែលភាយចេញមកក្រោយពេលញ៉ាំអាហារមានគ្រឿងទេសឆ្អែតឆ្អន់ដូចជា ខ្ទឹមស ខ្ទឹមក្រហម ការញ៉ាំគ្រឿងស្រវឹង ឬការជក់បារី ក៏សុទ្ធតែជាមូលហេតុធ្វើឱ្យមានក្លិនមាត់បណ្ដោះអាសន្ន ដែលអាចដោះស្រាយបានតាមរយៈការសម្អាតមាត់ធ្មេញឱ្យបានល្អ។
ប្រភេទទីពីរដែលជួបប្រទះញឹកញាប់បំផុតដល់ទៅ ៩០% គឺ ក្លិនមាត់បង្កឡើងពីបញ្ហាក្នុងប្រហោងមាត់ផ្ទាល់។ នេះអាចមកពីការសម្អាតមិនបានសព្វសាច់ ធ្វើឱ្យមានកម្ទេចអាហារកកស្ទះតាមចន្លោះធ្មេញ និងលើអណ្តាត ដែលជាចំណីរបស់បាក់តេរីបង្កក្លិនស្អុយរលួយ។ បញ្ហាអញ្ចាញធ្មេញ រលាកជើងធ្មេញ ធ្មេញពុកដែលមានរន្ធជ្រៅ ឬការប្រើប្រាស់ធ្មេញជន្លាស់ដែលសម្អាតមិនស្អាត សុទ្ធតែបង្កឱ្យមានក្លិនមាត់ឆួលខ្លាំងខុសធម្មតា។
ប្រភេទចុងក្រោយដែលគួរឱ្យបារម្ភបំផុតគឺ ក្លិនមាត់ដែលសបញ្ជាក់ពីជំងឺក្នុងសរីរាង្គផ្សេងៗ។ ប្រសិនបើមាត់មានក្លិនជូរ អាចជាសញ្ញានៃជំងឺច្រាលទឹកអាស៊ីតក្រពះ។ បើមានក្លិនស្អុយខ្លាំងដូចខ្ទុះ អាចមកពីជំងឺរលាកស៊ីនុស ឬរលាកអាមីដាល់។ អ្វីដែលកាន់តែពិសេសនោះ ប្រសិនបើដង្ហើមមានក្លិនដូចផ្លែឈើទុំ វាអាចជាសញ្ញានៃជំងឺទឹកនោមផ្អែមចំណែកក្លិនដូចទឹកនោម ឬអាម៉ូញាក់ អាចសបញ្ជាក់ពីបញ្ហាតម្រងនោមរីឯក្លិនឆ្អាបដូចត្រី អាចជាសញ្ញានៃបញ្ហាថ្លើម។
ក្លិនមាត់មិនមែនជារឿងដែលត្រូវអៀនខ្មាសរហូតលាក់ទុកនោះទេ ប៉ុន្តែវាជាឱកាសឱ្យយើងសង្កេតសុខភាពខ្លួនឯង។ ប្រសិនបើអ្នកបានសម្អាតមាត់ធ្មេញយ៉ាងដិតដល់ហើយ តែនៅតែមានក្លិនមិនបាត់ នោះគឺជាពេលដែលអ្នកត្រូវប្រញាប់ទៅពិគ្រោះជាមួយទន្តពេទ្យ ឬគ្រូពេទ្យជំនាញ ដើម្បីពិនិត្យរកមូលហេតុពិតប្រាកដ និងព្យាបាលឱ្យបានត្រឹមត្រូវ ដើម្បីសុខភាពរាងកាយមាំមួន និងភាពជឿជាក់ត្រឡប់មកវិញ៕