យោងតាមការចុះផ្សាយពីប្រភពបរទេស ការកណ្តាស់ គឺជាប្រតិកម្មធម្មជាតិរបស់រាងកាយ ដើម្បីបញ្ចេញវត្ថុប្លែកៗ ធូលីដី ឬមេរោគចេញពីផ្លូវដង្ហើម។ មនុស្សជាច្រើនតែងតែខ្ទប់ច្រមុះ និងមាត់ឱ្យជិតនៅពេលចង់កណ្តាស់ក្នុងចំណោមចំណោមមនុស្សច្រើនដើម្បីរក្សាមារយាទ ប៉ុន្តែការធ្វើបែបនេះប្រៀបដូចជាការបង្ខំឱ្យសម្ពាធដ៏មហាសាលបោកបក់ត្រឡប់ទៅក្នុងរាងកាយវិញ ដែលអាចបង្កគ្រោះថ្នាក់ដល់ជីវិត។
នៅពេលអ្នកកណ្តាស់ ខ្យល់ដែលបាញ់ចេញមកមានល្បឿនលឿនខ្លាំងរហូតដល់ ១៦០ គីឡូម៉ែត្រក្នុងមួយម៉ោង។ ប្រសិនបើអ្នកខ្ទប់វាមិនឱ្យចេញមកក្រៅ សម្ពាធខ្យល់នេះនឹងរុញច្រានទៅកាន់ផ្នែកខាងក្នុងនៃរាងកាយ ដែលអាចបណ្តាលឱ្យ ដាច់សរសៃឈាមខួរក្បាល (ទោះបីជាករណីនេះកម្រកើតមាន ប៉ុន្តែវាអាចធ្វើឱ្យពិការ ឬបាត់បង់ជីវិត)។ ក្រៅពីនេះ វាអាចធ្វើឱ្យ ដាច់សរសៃឈាមក្នុងគ្រាប់ភ្នែក បណ្ដាលឱ្យភ្នែកឡើងក្រហម ឬប៉ះពាល់ដល់ក្រដាសត្រចៀក រហូតដល់ហូរឈាមតាមត្រចៀក ឬថ្លង់មួយរំពេច។ ក្នុងករណីធ្ងន់ធ្ងរ សម្ពាធនេះថែមទាំងអាចធ្វើឱ្យរហែកសាច់ដុំទ្រូង សាច់ដុំដង្ហើម ឬខូចខាតបំពង់ខ្យល់ទៀតផង។
ដើម្បីសុវត្ថិភាព និងរក្សាមារយាទក្នុងពេលតែមួយ អ្នកជំនាញណែនាំថា នៅពេលមានអារម្មណ៍ថាចង់កណ្តាស់ អ្វីដែលល្អបំផុតគឺ “បណ្ដោយឱ្យវាចេញមកតាមធម្មជាតិ”។ ប្រសិនបើអ្នកនៅក្បែរអ្នកដទៃ អ្នកគ្រាន់តែងាកមុខចេញ រួចប្រើកន្សែង ឬប្រើផ្នត់កែងដៃខ្ទប់មាត់ និងច្រមុះ ប៉ុន្តែត្រូវ “ទុកចន្លោះឱ្យខ្យល់ចេញខ្លះ” កុំច្របាច់ច្រមុះឱ្យជិតឈឹងពេក។ ការធ្វើបែបនេះ មិនត្រឹមតែជួយការពារការឆ្លងមេរោគទៅអ្នកដទៃប៉ុណ្ណោះទេ ប៉ុន្តែវាក៏ជាការការពារសរីរាង្គសំខាន់ៗក្នុងរាងកាយរបស់អ្នកឱ្យជៀសផុតពីគ្រោះថ្នាក់ចៃដន្យផងដែរ៕