ការមានដើមដៃធំ និងសាច់ស្មាជ្រាយ មិនត្រឹមតែធ្វើឱ្យយើងបាត់បង់ទំនុកចិត្តក្នុងការស្លៀកពាក់ខោអាវវាលក្លៀក ឬអាវខ្សែតូចប៉ុណ្ណោះទេ ប៉ុន្តែវាក៏ធ្វើឱ្យរូបរាងកាយទាំងមូលមើលទៅរឹង និងធំជាងវ័យផងដែរ។
ដើម្បីទទួលបានដើមដៃតូចស្លីម និងសាច់ស្មារឹងមាំទាក់ទាញ អ្នកត្រូវការការរួមបញ្ចូលគ្នារវាង របបអាហារ និង ការហាត់ប្រាណចំគោលដៅ។ នេះគឺជាមគ្គុទ្ទេសក៍ពេញលេញសម្រាប់អ្នក ៖
១. របបអាហារ៖ កម្ចាត់ខ្លាញ់ពីខាងក្នុង
អ្នកមិនអាចសម្រកខ្លាញ់តែត្រង់ដើមដៃ ដោយមិនសម្រកខ្លាញ់ទូទាំងរាងកាយនោះទេ។ ដូច្នេះ របបអាហារគឺជាគ្រឹះស្ថាន៖
-កាត់បន្ថយជាតិស្ករ និងម្សៅចម្រាញ់ ៖ ជាតិស្ករលើសកម្រិតគឺជាមូលហេតុចម្បងដែលរាងកាយយកទៅសន្សំទុកជាខ្លាញ់នៅក្រោមស្បែក ជាពិសេសត្រង់ដើមដៃ។
-បង្កើនប្រូតេអ៊ីន៖ ការញ៉ាំសាច់ទ្រូងមាន់ ត្រី ស៊ុត ឬសណ្តែក ជួយឱ្យសាច់ដុំដុះមកជំនួសកន្លែងខ្លាញ់ និងជួយឱ្យសាច់ដុំណែនល្អមិនយារធ្លាក់។
-ញ៉ាំទឹកឱ្យបានច្រើន៖ ទឹកជួយជម្រុញការរំលាយអាហារ និងកាត់បន្ថយការហើមសាច់។
២. លំហាត់ប្រាណចំគោលដៅ
ដើម្បីឱ្យដើមដៃ និងស្មានៅណែនស្អាត អ្នកគួរអនុវត្តលំហាត់ប្រាណទាំងនេះ ៣-៤ ដងក្នុងមួយសប្តាហ៍៖
ក. លំហាត់ប្រាណបង្រួមដើមដៃ
លំហាត់ប្រាណនេះផ្តោតខ្លាំងលើសាច់ដុំត្រង់ផ្នែកខាងក្រោយនៃដើមដៃ (កន្លែងដែលខ្លាញ់ចូលចិត្តនៅ)។
-របៀបធ្វើ៖ ប្រើកៅអី ឬគែមគ្រែ រួចដាក់ដៃទាំងពីរច្រត់ទៅក្រោយ ទម្លាក់ខ្លួនចុះឡើងយឺតៗ ដោយប្រើកម្លាំងដៃ។ ធ្វើឱ្យបាន ១៥ ដង ក្នុង ៣ ឈុត។
ខ. ការអាវ៉ង់
ការអាវ៉ង់មិនត្រឹមតែជួយដើមទ្រូងទេ ប៉ុន្តែវាជួយឱ្យស្មា និងដើមដៃរឹងមាំ និងមានរាងស្រឡូន។
– បើអ្នកជាមនុស្សថ្មី អាចដាក់ជង្គង់ចុះដល់ដីដើម្បីកាត់បន្ថយទម្ងន់ រួចសឹមងើបមកអាវ៉ង់ពេញទំហំនៅពេលក្រោយ។
គ. ការប្រើដុំដែកទម្ងន់ស្រាល
ដើម្បីឱ្យស្មាមើលទៅស្អាត (Sexy Shoulders) និងមានរាងអក្សរ V តិចៗ ដែលធ្វើឱ្យចង្កេះមើលទៅតូចជាងមុន។
–កាន់ដុំដែកតូចៗ (០.៥ ទៅ ១ គីឡូក្រាម) រួចលើកដៃសណ្តូកទៅសងខាងឱ្យស្របនឹងស្មា រួចទម្លាក់ចុះវិញ។ ធ្វើបែបនេះយឺតៗ ១២ ដង ក្នុង ៣ ឈុត។
៣. ការផ្លាស់ប្តូរទម្លាប់រស់នៅ
-កុំអង្គុយខុបខ្នង ៖ ការអង្គុយខុបខ្នងធ្វើឱ្យសាច់ដុំស្មា និងក ខ្សោយ ដែលធ្វើឱ្យដើមដៃមើលទៅធំ និងធ្លាក់ចុះក្រោម។ ព្យាយាមងើបឈរឱ្យត្រង់ខ្លួនជានិច្ច។
-គេងឱ្យបានគ្រប់គ្រាន់៖ ការសម្រាកជួយឱ្យសាច់ដុំដែលហាត់រួចឆាប់រឹងមាំ និងជួយឱ្យរាងកាយដុតខ្លាញ់បានល្អនៅពេលយប់។
-ការធ្វើម៉ាស្សា៖ ការប្រើឡេបំបាត់ស្នាម ឬម៉ាស្សាសម្រួលចរន្តឈាមត្រង់ដើមដៃ ក៏ជួយឱ្យស្បែកតឹងណែនផងដែរ។
៤. គន្លឹះស្លៀកពាក់បន្លំភ្នែក
ក្នុងកំឡុងពេលដែលអ្នកកំពុងហាត់ប្រាណ អ្នកអាចប្រើបច្ចេកទេសស្លៀកពាក់ដើម្បីឱ្យមើលទៅឃើញដៃតូច៖
-ជ្រើសរើសអាវដែលមានដៃវែងដល់កែងដៃ ឬអាវដៃប៉ោងតិចៗ។
-ចៀសវាងអាវដែលមានរឹបខ្លាំងត្រង់ដើមដៃ ឬមានការតុបតែងប៉ាក់ច្រើនពេកត្រង់ស្មា។