យោងតាមការចុះផ្សាយពីប្រភពបរទេស ក្នុងសម័យឌីជីថល ការកាន់ទូរស័ព្ទជាប់ខ្លួនគ្រប់វិនាទីបានក្លាយជាទម្លាប់ទៅហើយ សូម្បីតែពេលចូលបន្ទប់ទឹក។ ប៉ុន្តែអ្នកដឹងទេថា ការអង្គុយលេងទូរស័ព្ទក្នុងពេលបត់ជើងធំ គឺជាសត្រូវដ៏ធំបំផុតចំពោះសុខភាពរន្ធគូថ និងជាមូលហេតុចម្បងដែលបង្កឱ្យកើត “ជំងឺឫសដូងបាត” ដោយមិនដឹងខ្លួន។
ជាធម្មតា ការបត់ជើងធំមិនគួរប្រើពេលលើសពី ៥ ទៅ ១០ នាទីឡើយ។ ប៉ុន្តែនៅពេលអ្នកជជក់នឹងអេក្រង់ទូរស័ព្ទ វាធ្វើឱ្យអ្នកភ្លេចខ្លួនហើយអង្គុយត្រាំក្នុងបន្ទប់ទឹកយូរហួសហេតុ។ ការអង្គុយក្នុងកាយវិការដដែលយូរពេក បង្កើនសម្ពាធយ៉ាងខ្លាំងទៅលើសរសៃឈាមវ៉ែននៅជុំវិញរន្ធគូថ ធ្វើឱ្យសរសៃឈាមទាំងនោះឡើងប៉ោង រលាក និងក្លាយជាដុំឫសដូងក្នុងបំផុត។ លើសពីនេះ ការយកចិត្តទុកដាក់លើទូរស័ព្ទធ្វើឱ្យខួរក្បាលខ្វះការផ្ដោតអារម្មណ៍លើការបញ្ជារាងកាយឱ្យបន្ទោបង់ ដែលនាំឱ្យអ្នកត្រូវប្រឹងខ្លាំងជាងមុន បង្កជាការដាច់រហែក ឬឈាមកកក្នុងសរសៃឈាម។
ប្រសិនបើអ្នកសង្កេតឃើញសញ្ញាព្រមានដូចជា មានឈាមស្រស់ស្រក់មកក្រោយពេលបត់ជើង មានដុំសាច់លយចេញមកក្រៅ ឬមានអាការៈរមាស់ និងឈឺចាប់នៅតំបន់រន្ធគូថ នោះបញ្ជាក់ថាដល់ពេលដែលអ្នកត្រូវផ្លាស់ប្តូរទម្លាប់ហើយ។ ដើម្បីការពារខ្លួនពីជំងឺនេះ អ្នកគួរទុកទូរស័ព្ទនៅខាងក្រៅបន្ទប់ទឹក ផ្ដោតអារម្មណ៍លើការបត់ជើងឱ្យបានរហ័ស ញ៉ាំទឹកឱ្យបានច្រើន និងបរិភោគអាហារដែលមានជាតិកាកសរសៃខ្ពស់ដូចជាបន្លែ និងផ្លែឈើ ដើម្បីឱ្យលាមកទន់ងាយស្រួលបញ្ចេញមកក្រៅ។ ការផ្ដល់អាទិភាពដល់សុខភាពរាងកាយ គឺសំខាន់ជាងការកម្សាន្តលើអេក្រង់ក្នុងបន្ទប់ទឹកតែពីរបីនាទីនោះឡើយ៕