យោងតាមការចុះផ្សាយពីប្រភពបរទេស ផ្លែដូងមិនត្រឹមតែជាផ្លែឈើសម្រាប់ដោះស្រាយការស្រេកទឹក ឬធ្វើជាគ្រឿងបន្សំក្នុងម្ហូបអាហារប៉ុណ្ណោះទេ ប៉ុន្តែវាប្រៀបដូចជា “ឱសថធម្មជាតិ” ដែលផ្ដល់គុណសម្បត្តិខុសៗគ្នាទៅតាមអាយុកាលរបស់វា។ ការយល់ដឹងពីពេលវេលាដែលត្រូវប្រើប្រាស់ដូងខ្ចី និងដូងទុំ នឹងជួយឱ្យអ្នកទាញយកអត្ថប្រយោជន៍សុខភាពបានអតិបរមា និងបង្កើនរសជាតិអាហារបានយ៉ាងឥតខ្ចោះ។
នៅពេលរាងកាយរបស់អ្នកមានអារម្មណ៍ថាស្អុះស្អាប់ បាត់បង់ជាតិទឹកក្រោយហាត់ប្រាណ ឬស្ថិតក្នុងអាកាសធាតុក្ដៅខ្លាំង នោះគឺជាពេលវេលាដែលអ្នកត្រូវការ “ដូងខ្ចី” ជាបំផុត។ ទឹកដូងខ្ចីគឺជាឱសថផ្ដល់សំណើមដ៏អស្ចារ្យ ព្រោះវាសម្បូរទៅដោយអេឡិចត្រូឡៃដូចជា ប៉ូតាស្យូម និងម៉ាញ៉េស្យូម ដែលជួយសម្រួលចង្វាក់បេះដូង និងបញ្ចុះកម្ដៅក្នុងបានយ៉ាងរហ័ស។ ចំណែកសាច់ដូងខ្ចីដែលមានសភាពទន់ល្មើយ គឺជាប្រភពនៃខ្លាញ់ល្អ ដែលរាងកាយអាចយកទៅប្រើប្រាស់ជាថាមពលបានភ្លាមៗ ជួយដល់ការដុតរំលាយអាហារ និងសម្រួលដល់ការបញ្ចេញជាតិពុលតាមទឹកនោមទៀតផង។
ផ្ទុយទៅវិញ ប្រសិនបើអ្នកត្រូវការថាមពលដើម្បីពង្រឹងប្រព័ន្ធការពាររាងកាយ ឬចង់ចម្អិនម្ហូបឱ្យមានរសជាតិឈ្ងុយឆ្ងាញ់ពិសា អ្នកគួរងាកមកប្រើ “ដូងទុំ” វិញ។ សាច់ដូងទុំដែលក្រាស់ និងមានជាតិប្រេងច្រើន សម្បូរទៅដោយអាស៊ីតឡរិកដែលជាសារធាតុមានសមត្ថភាពជួយប្រឆាំងនឹងមេរោគ បាក់តេរី និងការរលាកផ្សេងៗក្នុងរាងកាយ។ ទឹកខ្ទិះដែលពូតចេញពីដូងទុំ មិនត្រឹមតែជួយឱ្យសម្លការី ឬបង្អែមមានភាពឈ្ងុយខ្ទិះឆ្ងាញ់ពិសានោះទេ ប៉ុន្តែវាក៏ផ្ដល់នូវកាកសរសៃខ្ពស់ជួយដល់ការបន្ទោបង់ និងផ្ដល់ថាមពលយូរអង្វែង។
ការប្រើប្រាស់ដូងឱ្យចំគោលដៅ គឺលើសពីការញ៉ាំឱ្យឆ្ងាញ់មាត់ តែវាគឺជាការប្រើប្រាស់ធម្មជាតិដើម្បីថែរក្សាសុខភាពឱ្យមាំមួនជានិច្ច៕
ការប្រុងប្រយ័ត្ន!
ព័ត៌មាននេះគ្រាន់តែជាចំណេះដឹងទូទៅប៉ុណ្ណោះ។ បើសិនជាអ្នកមានបញ្ហាសុខភាពមិនប្រក្រតីណាមួយ សូមមេត្តាទៅជួបពិគ្រោះជាមួយគ្រូពេទ្យជំនាញ ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ៕