យោងតាមការចុះផ្សាយពីប្រភពបរទេស ក្នុងស្ថានភាពមមាញឹកដូចជាការជាប់ប្រជុំ ការធ្វើដំណើរឆ្ងាយ ឬរកបន្ទប់ទឹកមិនឃើញ មនុស្សជាច្រើនតែងជ្រើសរើសវិធី “ទ្រាំនោម”។ ប៉ុន្តែអ្នកដឹងទេថា ការបង្ខំក្បាលម៉ាស៊ីនរាងកាយឱ្យធ្វើការផ្ទុយពីធម្មជាតិបែបនេះ មិនមែនត្រឹមតែធ្វើឱ្យឈឺពោះតិចតួចនោះទេ វាកំពុងតែបំផ្លាញសុខភាពរបស់អ្នកពីខាងក្នុងយ៉ាងធ្ងន់ធ្ងរ។
ជាធម្មតា ប្លោកនោមមានតួនាទីដូចជាថង់យឺតសម្រាប់ស្តុកទឹកនោមដែលបញ្ចេញពីតម្រងនោម។ នៅពេលទឹកនោមពេញដល់កម្រិតណាមួយ វានឹងផ្ញើសញ្ញាទៅខួរក្បាលដើម្បីឱ្យយើងដឹងថាដល់ពេលត្រូវបញ្ចេញចោលហើយ។ ការទ្រាំនោមជាប្រចាំនឹងធ្វើឱ្យបាក់តេរីក្នុងទឹកនោមមានឱកាសរីកសាយភាយកាន់តែលឿន បង្កឱ្យមានការរលាកផ្លូវនោម និងប្លោកនោមរ៉ាំរ៉ៃ។ អ្វីដែលគួរឱ្យខ្លាចបំផុតនោះគឺ “បាតុភូតទឹកនោមហូរត្រឡប់” ដែលសម្ពាធក្នុងប្លោកនោមខ្លាំងពេក រុញច្រានទឹកនោមឱ្យហូរត្រឡប់ទៅរកតម្រងនោមវិញ ដែលអាចឈានទៅដល់ការខូចតម្រងនោមស្រួចស្រាវ និងកើតក្រួសក្នុងតម្រងនោមថែមទៀតផង។
ក្រៅពីបញ្ហាតម្រងនោម ការទ្រាំនោមយូរពេកក៏ធ្វើឱ្យសាច់ដុំខ្ទប់នោមចុះខ្សោយ ដែលក្នុងរយៈពេលវែង វានឹងធ្វើឱ្យអ្នកបាត់បង់សមត្ថភាពក្នុងការគ្រប់គ្រងការបត់ជើងតូច ឬនោមមិនអស់។ ដូច្នេះ ដើម្បីការពារសុខភាពឱ្យបានយូរអង្វែង អ្នកគួរឆ្លើយតបទៅនឹងសញ្ញាប្រាប់ហេតុរបស់រាងកាយដោយការទៅបន្ទប់ទឹកភ្លាមៗនៅពេលមានអារម្មណ៍ថាឈឺនោម។ កុំបណ្ដោយឱ្យភាពមមាញឹកត្រឹមមួយខណៈ ក្លាយជាវិប្បដិសារីសុខភាពអស់មួយជីវិត៕