យោងតាមការចុះផ្សាយពីប្រភពបរទេស ទឹកក្រូចស្រស់ត្រូវបានគេស្គាល់ថាជា “ស្តេចវីតាមីន C” ដែលជួយពង្រឹងប្រព័ន្ធការពាររាងកាយ និងធ្វើឱ្យស្បែកភ្លឺថ្លា។ ប៉ុន្តែភាពល្អឥតខ្ចោះនេះអាចប្រែជាគ្រោះថ្នាក់វិញភ្លាមៗ ប្រសិនបើអ្នកញ៉ាំវានៅក្នុងពេលវេលាដែលរាងកាយមិនទាន់ត្រៀមខ្លួនរួចរាល់។ ការយល់ដឹងពី “ពេលវេលាដែលត្រូវជៀសវាង” គឺជាគន្លឹះការពារសុខភាពដែលអ្នកមិនអាចមើលរំលងបាន។
កំហុសឆ្គងដែលធ្ងន់ធ្ងរបំផុតគឺការញ៉ាំទឹកក្រូចនៅពេល ពោះទទេ។ ជាតិអាស៊ីតស៊ីទ្រីក ក្នុងទឹកក្រូចនឹងទៅប្រតិកម្មជាមួយអាស៊ីតក្រពះ បង្កជាការរលាកភ្នាសក្រពះយ៉ាងខ្លាំង ដែលយូរៗទៅអាចវិវត្តទៅជាដំបៅក្រពះរ៉ាំរ៉ៃ។ ចំណែកឯការញ៉ាំនៅ ពេលយប់មុនចូលគេង វីតាមីន C និងជាតិរ៉ែដែលលើសនឹងធ្វើឱ្យតម្រងនោមធ្វើការធ្ងន់ដើម្បីចម្រោះចេញ ដែលអាចបង្កជាគ្រួសក្នុងតម្រងនោម និងធ្វើឱ្យអ្នកនោមយប់រំខានដល់ដំណេកទៀតផង។
អាថ៌កំបាំងមួយទៀតដែលមនុស្សជាច្រើនមិនដឹង គឺការ ហាមញ៉ាំទឹកក្រូចជាមួយទឹកដោះគោ។ ប្រូតេអ៊ីនក្នុងទឹកដោះគោនឹងទៅបុកទង្គិចជាមួយជាតិអាស៊ីតក្នុងទឹកក្រូច បង្កើតបានជាដុំកំណកដែលពិបាករំលាយ បណ្ដាលឱ្យអ្នកមានអាការៈហើមពោះ ឈឺពោះ ឬរាគរូសភ្លាមៗ។ លើសពីនេះ ប្រសិនបើអ្នកកំពុងប្រើប្រាស់ថ្នាំពេទ្យ ការញ៉ាំទឹកក្រូចអាចទៅកាត់បន្ថយប្រសិទ្ធភាពថ្នាំ ឬបង្កជាផលរំខានមិនល្អ ដូច្នេះគួរទុកចន្លោះពេលយ៉ាងតិច ១ ទៅ ២ ម៉ោង។
ដើម្បីទទួលបានអត្ថប្រយោជន៍ពេញលេញ ពេលវេលាមាសគឺ នៅពេលព្រឹក ក្រោយអាហារសម្រន់ ១ ម៉ោង។ នេះគឺជាពេលដែលក្រពះមានសុវត្ថិភាពក្នុងការស្រូបយកសារធាតុចិញ្ចឹម ដើម្បីផ្ដល់ថាមពល និងភាពស្រស់ស្រាយពេញមួយថ្ងៃ។ ការញ៉ាំឱ្យត្រូវពេល នឹងបំប្លែងទឹកក្រូចពី “ការគំរាមកំហែង” មកជា “ឱសថ” សម្រាប់សុខភាពអ្នកយ៉ាងពិតប្រាកដ៕