យោងតាមការចុះផ្សាយពីប្រភពបរទេស ការអង្គុយជាប់កៅអីឆ្លៀតញ៉ាំបាយបណ្ដើរ វាយឯកសារបណ្ដើរ អាចមើលទៅដូចជាការខំប្រឹងធ្វើការ ប៉ុន្តែតាមពិតវាគឺជា “អន្ទាក់” ដែលបំផ្លាញសុខភាព និងផលិតភាពរបស់អ្នកយ៉ាងធ្ងន់ធ្ងរ។ ការសិក្សាថ្មីៗបានបង្ហាញថា ទម្លាប់បែបនេះបង្កជាផលប៉ះពាល់ជាខ្សែច្រវាក់ ដែលធ្វើឱ្យរាងកាយ និងខួរក្បាលរបស់អ្នកចុះខ្សោយដោយមិនដឹងខ្លួន។
នៅពេលអ្នកព្យាយាមធ្វើការច្រើនក្នុងពេលតែមួយ ខួរក្បាលនឹងបង្ខំឱ្យរាងកាយស្ថិតក្នុង “របៀបធ្វើការ” ជានិច្ច។ ស្ថានភាពនេះនឹងទៅរារាំងការផលិតអាស៊ីតក្រពះ និងអង់ស៊ីមរំលាយអាហារ ដែលនាំឱ្យការស្រូបយកសារធាតុចិញ្ចឹមចុះខ្សោយ បង្កជាបញ្ហាក្រពះពោះវៀន និងធ្វើឱ្យអ្នកមានអារម្មណ៍អស់កម្លាំងល្ហិតល្ហៃនៅពេលរសៀល។ លើសពីនេះ អ្នកដែលញ៉ាំបាយនៅតុធ្វើការ ភាគច្រើនតែងជ្រើសរើសអាហាររហ័សដែលមានជាតិខ្លាញ់ខ្ពស់ ដែលនាំឱ្យកម្រិតជាតិស្ករក្នុងឈាមមិនមានលំនឹង និងបង្កជាសម្ពាធដល់ផ្លូវចិត្តកាន់តែខ្លាំង។
អ្នកជំនាញបានបញ្ជាក់ថា ការឈប់សម្រាកញ៉ាំអាហារឱ្យបានត្រឹមត្រូវឆ្ងាយពីតុធ្វើការ ជួយឱ្យប្រព័ន្ធប្រសាទដែលគ្រប់គ្រង “ការសម្រាក និងការរំលាយអាហារ” ដំណើរការបានល្អ។ ការផ្អាកពីការងារមួយរយៈខ្លី មិនមែនជាការខាតបង់ពេលវេលាទេ ប៉ុន្តែវាគឺជា “ការសាកថ្ម” ដែលជួយឱ្យស្មារតីភ្លឺស្វាង ផ្ដល់គំនិតច្នៃប្រឌិតថ្មីៗ និងបង្កើនប្រសិទ្ធភាពការងារបានដល់ទៅ 82%។
ដើម្បីរក្សាសុខភាពឱ្យបានល្អ និងការងារកាន់តែមានប្រសិទ្ធភាព អ្នកគួរជ្រើសរើសញ៉ាំអាហារដែលមានតុល្យភាព (កាបូអ៊ីដ្រាត ប្រូតេអ៊ីន និងខ្លាញ់ល្អ) និងត្រូវដាច់ខាតងើបចេញពីតុធ្វើការ ដើម្បីឱ្យខួរក្បាល និងរាងកាយបានសម្រាកពិតប្រាកដ៕