យោងតាមការចុះផ្សាយពីប្រភពបរទេស មនុស្សជាច្រើនយល់ថា ការទំពារទឹកកកគ្រាន់តែជាវិធីជួយរំសាយកម្ដៅ ឬជាទម្លាប់ធម្មតាមួយ ប៉ុន្តែតាមពិតទៅ ការញៀនទំពារទឹកកកជាប់ជានិច្ច (ភាសាបច្ចេកទេសហៅថា Pagophagia) គឺជាសញ្ញាអាសន្នដែលរាងកាយកំពុងបញ្ជូនមកប្រាប់ពីបញ្ហាសុខភាពផ្ទៃក្នុង។
បើតាមការសិក្សាវេជ្ជសាស្ត្រ ប្រហែល ៥០% នៃអ្នកដែលមានទម្លាប់នេះ គឺជាអ្នកដែលកំពុងប្រឈមនឹង “ជំងឺស្លេកស្លាំងដោយសារខ្វះជាតិដែក” ហើយវាក៏អាចផ្សារភ្ជាប់ទៅនឹងបញ្ហាផ្លូវចិត្តដូចជា ភាពតានតឹងខ្លាំង ឬរោគសញ្ញានៃការគិតដដែលៗ ផងដែរ។
ក្រៅពីជាសញ្ញានៃជំងឺបង្កប់ខ្លួន ការទំពារទឹកកកផ្ដល់ផលប៉ះពាល់ផ្ទាល់ដល់សុខភាពមាត់ធ្មេញ ដូចជាធ្វើឱ្យធ្មេញសឹក ស្រុត បែក ឬបាក់ ដែលទាមទារការព្យាបាលយ៉ាងលំបាក និងចំណាយថវិកាច្រើន។ លើសពីនេះ ប្រសិនបើទឹកកកដែលអ្នកបរិភោគមិនមានអនាម័យត្រឹមត្រូវ វាអាចនាំឱ្យមានការឆ្លងមេរោគ បាក់តេរី ឬសត្វល្អិត ដែលបង្កឱ្យមានជំងឺរាករូស និងបញ្ហាប្រព័ន្ធរំលាយអាហារធ្ងន់ធ្ងរទៀតផង។ ការទំពារទឹកកកឮសូរខ្លាំងៗនៅកន្លែងសាធារណៈ ក៏អាចធ្វើឱ្យអ្នកបាត់បង់សុជីវធម៌ និងភាពជឿជាក់លើខ្លួនឯងដោយមិនដឹងខ្លួន។
ដើម្បីកាត់បន្ថយទម្លាប់នេះ អ្នកគួរព្យាយាមបង្ខំចិត្តកាត់បន្ថយបរិមាណទឹកកកដែលញ៉ាំប្រចាំថ្ងៃ ប្តូរមកញ៉ាំទឹកត្រជាក់ជំនួសវិញ ឬជ្រើសរើសទឹកកកដុំតូចៗដែលងាយរលាយ ដើម្បីការពារធ្មេញរបស់អ្នក។ ប្រសិនបើអ្នកមានអារម្មណ៍ថា មិនអាចបញ្ឈប់ការទំពារទឹកកកបានទាល់តែសោះ អ្នកគួរតែទៅជួបគ្រូពេទ្យជំនាញ ដើម្បីពិនិត្យឈាមរកមើលកម្រិតជាតិដែក ឬពិគ្រោះជាមួយអ្នកជំនាញផ្លូវចិត្ត ដើម្បីស្វែងរកមូលហេតុពិតប្រាកដ និងទទួលបានការព្យាបាលឱ្យបានត្រឹមត្រូវបំផុត៕