យោងតាមការចុះផ្សាយពីប្រភពបរទេស មាតាបិតា ឬបុគ្គលជាច្រើនជឿថា ស្នាមខ្មៅដិតនៅជុំវិញក ក្លៀក ឬក្រលៀន គឺជាក្អែលដែលបណ្តាលមកពីការងូតទឹកមិនស្អាត។ ប៉ុន្តែតាមការពិត អ្នកជំនាញសើស្បែកបានព្រមានថា នេះមិនមែនជាបញ្ហាអនាម័យឡើយ វាគឺជាសញ្ញាព្រមាននៃប្រព័ន្ធរំលាយអាហារក្នុងរាងកាយដែលមានឈ្មោះថា “Acanthosis Nigricans”។
ស្ថានភាពស្បែកបែបនេះ ច្រើនតែទាក់ទងនឹងកម្រិតអាំងស៊ុយលីនក្នុងឈាមឡើងខ្ពស់ខុសធម្មតា ដែលអាចឈានទៅរកជំងឺទឹកនោមផ្អែមប្រភេទទី២ ប្រសិនបើមិនបានព្យាបាលទាន់ពេលវេលា។
ស្នាមខ្មៅទាំងនេះកើតឡើងដោយសារកោសិកាស្បែកលូតលាស់ខុសប្រក្រតី ជាពិសេសចំពោះអ្នកដែលចូលចិត្តញ៉ាំអាហារផ្អែម ឬម្សៅសម្រិតសម្រាំងក្នុងបរិមាណច្រើន។ កាលណាអាំងស៊ុយលីនឡើងខ្ពស់ជាប់រហូត វានឹងទៅជំរុញឱ្យស្បែកឡើងក្រាស់ និងបង្កកជាតិពណ៌នៅតាមបណ្តាផ្នត់នៃរាងកាយ ដែលធ្វើឱ្យយើងមើលទៅឃើញដូចជាស្នាមប្រឡាក់ខ្មៅដិត ឬមានសភាពដូចជាស្បែកសត្វស្លាប។ ក្រៅពីស្បែកខ្មៅ អ្នកខ្លះអាចមានសភាពស្បែកគ្រើមដូចក្រណាត់ម្ញ៉ង់ និងអាចមានដុះសាច់តូចៗនៅជុំវិញនោះថែមទៀតផង។
ក្រុមមនុស្សដែលគួរប្រុងប្រយ័ត្នបំផុត គឺអ្នកដែលមានទម្ងន់លើសកម្រិត (ធាត់) អ្នកដែលមានសមាជិកគ្រួសារមានប្រវត្តិជំងឺទឹកនោមផ្អែម និងស្ត្រីដែលមានបញ្ហាគីសក្នុងអូវែ។ ទោះបីជាស្នាមខ្មៅនេះមិនមែនជាជំងឺទឹកនោមផ្អែមផ្ទាល់ ប៉ុន្តែវាគឺជា “ប្រព័ន្ធប្រកាសអាសន្ន” ដ៏សំខាន់ដែលរាងកាយចង់ប្រាប់ថា អ្នកកំពុងមានសភាពស៊ាំនឹងអាំងស៊ុយលីនហើយ។
ដើម្បីដោះស្រាយបញ្ហានេះ គន្លឹះសំខាន់បំផុតគឺការសម្រកទម្ងន់ឱ្យបានត្រឹមត្រូវ និងការផ្លាស់ប្តូររបបអាហារដោយកាត់បន្ថយជាតិស្ករ និងម្សៅឱ្យបានច្រើនបំផុត។ តាមទិន្នន័យវេជ្ជសាស្ត្រ ការសម្រកទម្ងន់ត្រឹមតែ 5% ទៅ 10% នៃទម្ងន់សរុប អាចជួយឱ្យស្នាមខ្មៅទាំងនេះបាត់ទៅវិញដោយមើលឃើញច្បាស់។
ការយកចិត្តទុកដាក់លើសញ្ញាតូចតាចនៅលើស្បែក និងការពិនិត្យឈាមតាមដានកម្រិតជាតិស្ករ គឺជាវិធីសាស្ត្រដ៏ល្អបំផុតក្នុងការការពារសុខភាព និងបង្ការជំងឺរ៉ាំរ៉ៃក្នុងរយៈពេលវែង៕