យោងតាមការចុះផ្សាយពីប្រភពបរទេស ជាទូទៅ យើងតែងគិតថាប្រូតេអ៊ីនមានតែក្នុងសាច់សត្វ ប៉ុន្តែការពិតបន្លែ និងរុក្ខជាតិមួយចំនួនក៏ជាប្រភពប្រូតេអ៊ីនដ៏អស្ចារ្យ ដែលផ្ដល់ទាំងវីតាមីន រ៉ែខនិក និងជាតិសរសៃសម្រាប់សុខភាពរាងកាយទាំងមូល។ ការបញ្ចូលប្រូតេអ៊ីនពីរុក្ខជាតិទៅក្នុងរបបអាហារ មិនត្រឹមតែជួយស្ដារ និងកសាងសាច់ដុំប៉ុណ្ណោះទេ ប៉ុន្តែថែមទាំងជួយការពារជំងឺ និងពង្រឹងប្រព័ន្ធការពាររាងកាយទៀតផង។
ក្នុងចំណោមនោះ “សណ្តែកឡង់ទី” ឈរនៅលំដាប់ជួរមុខ ដោយផ្ដល់ប្រូតេអ៊ីនរហូតដល់ជិត ១៨ ក្រាមក្នុងមួយពែង ហើយវាកាន់តែមានគុណភាពខ្ពស់នៅពេលញ៉ាំជាមួយបាយ។
បន្លែបៃតងដែលយើងធ្លាប់ស្គាល់ដូចជា “ស្ពៃពួយឡេង” និង “ផ្កាខាត់ណាខៀវ” ក៏ជាជម្រើសដ៏វិសេស ដោយស្ពៃពួយឡេងផ្ដល់ប្រូតេអ៊ីន ៦ ក្រាម ក្នុងកាឡូរីទាបបំផុត ចំណែកផ្កាខាត់ណាខៀវសម្បូរវីតាមីន C ដែលជួយឱ្យរាងកាយស្រូបយកជាតិដែកបានកាន់តែល្អ។ បន្ថែមពីនេះ “សណ្តែកសៀង” និង “ប្រពាយបារាំង” គឺជាជំនួយការផ្ដល់ថាមពល និងវីតាមីន K សម្រាប់សុខភាពឆ្អឹង រួមជាមួយ “បេះដូងផ្កាអាទីសូ” ដែលផ្ដល់ប្រូតេអ៊ីនដល់ទៅ ១០ ក្រាម និងសារធាតុប្រឆាំងអុកស៊ីតកម្មខ្ពស់។
ការចម្អិនបន្លែទាំងនេះដោយវិធីចំហុយ ឬឆារហ័សៗ នឹងជួយរក្សារសជាតិ និងគុណតម្លៃអាហារូបត្ថម្ភបានល្អបំផុត។ ទោះបីជាអ្នកមិនមែនជាអ្នកញ៉ាំអាហារបួស ក៏ការបន្ថែមបន្លែសម្បូរប្រូតេអ៊ីនទាំង ៦ មុខនេះ នឹងជួយឱ្យរបបអាហារប្រចាំថ្ងៃរបស់អ្នកកាន់តែមានតុល្យភាព ជួយគ្រប់គ្រងជាតិស្ករក្នុងឈាម និងរក្សាទម្ងន់ឱ្យបានសមសួនជានិច្ច៕