ការដុតរំលាយអាហារ គឺជាដំណើរការគីមីដែលរាងកាយផ្លាស់ប្តូរអាហារ និងភេសជ្ជៈទៅជាថាមពល ។ មនុស្សដែលមានប្រព័ន្ធដុតរំលាយអាហារលឿន ងាយស្រួលក្នុងការរក្សាទម្ងន់ និងមានស្មារតីស្រស់ថ្លា ។ ផ្ទុយទៅវិញ បើប្រព័ន្ធនេះយឺត វានឹងធ្វើឱ្យអ្នកឆាប់ឡើងទម្ងន់ និងមានអារម្មណ៍អស់កម្លាំង។
ខាងក្រោមនេះ គឺជាវិធីសាស្ត្របែបវិទ្យាសាស្ត្រ ដើម្បីជួយជម្រុញការដុតរំលាយអាហារក្នុងរាងកាយរបស់អ្នកឱ្យកាន់តែមានប្រសិទ្ធភាព៖
១. បង្កើនការញ៉ាំប្រូតេអ៊ីន
រាងកាយត្រូវការថាមពលច្រើនជាងមុនដើម្បីរំលាយប្រូតេអ៊ីន បើធៀបនឹងជាតិខ្លាញ់ ឬកាបូអ៊ីដ្រាត។ បាតុភូតនេះហៅថា Thermic Effect of Food (TEF)។
-អត្ថប្រយោជន៍៖ ការញ៉ាំប្រូតេអ៊ីន (សាច់ទ្រូងមាន់, ត្រី, ស៊ុត, សណ្ដែក) ជួយបង្កើនអត្រាដុតរំលាយអាហារពី ១៥% ទៅ ៣០% និងជួយឱ្យអ្នកឆ្អែតបានយូរ ការពារការញ៉ាំលើសចំណុះ។
២. ហាត់ប្រាណលើកទម្ងន់ ឬបង្កើនសាច់ដុំ
សាច់ដុំគឺជាម៉ាស៊ីនដុតកាឡូរីដ៏អស្ចារ្យបំផុត។ ទោះបីជាអ្នកកំពុងសម្រាក ឬដេកលក់ក៏ដោយ ក៏សាច់ដុំនៅតែបន្តដុតកាឡូរីច្រើនជាងជាតិខ្លាញ់។
-តិចនិក ៖ ព្យាយាមហាត់ប្រាណបែបលើកទម្ងន់ ឬប្រើកម្លាំងបាយយ៉ាងហោចណាស់ ២-៣ ដងក្នុងមួយសប្តាហ៍ ដើម្បីបង្កើនម៉ាសសាច់ដុំ។
៣. ញ៉ាំទឹកត្រជាក់ឱ្យបានគ្រប់គ្រាន់
ទឹកគឺជាកត្តាចាំបាច់សម្រាប់ដំណើរការដុតរំលាយអាហារ។ ការសិក្សាបង្ហាញថា ការញ៉ាំទឹក ០.៥ លីត្រ អាចបង្កើនការដុតរំលាយអាហារបានដល់ទៅ ៣០% ក្នុងរយៈពេលមួយម៉ោង។
-ហេតុអ្វីទឹកត្រជាក់? នៅពេលអ្នកញ៉ាំទឹកត្រជាក់ រាងកាយត្រូវប្រើថាមពលបន្ថែមដើម្បីកម្តៅទឹកនោះឱ្យមានសីតុណ្ហភាពស្មើនឹងរាងកាយ ដែលនេះជាការដុតកាឡូរីដោយស្វ័យប្រវត្តិ។
៤. ហាត់ប្រាណបែប HIIT (High-Intensity Interval Training)
ការហាត់ប្រាណដែលមានកម្រិតធ្ងន់ និងលឿនក្នុងរយៈពេលខ្លី (ដូចជាការរត់លឿនអស់កម្លាំង រួចឈប់សម្រាកបន្តិច ហើយរត់បន្ត) ជួយឱ្យរាងកាយបន្តដុតកាឡូរីបានយូរ ទោះបីជាអ្នកហាត់ចប់ក៏ដោយ។
-លទ្ធផល៖ វាជួយជម្រុញការដុតបំផ្លាញជាតិខ្លាញ់បានលឿនជាងការហាត់ប្រាណបែបយឺតៗធម្មតា។
៥. គេងឱ្យបានគ្រប់គ្រាន់ និងមានគុណភាព
ការខ្វះការសម្រាក គឺជាមូលហេតុចម្បងដែលធ្វើឱ្យប្រព័ន្ធដុតរំលាយអាហារចុះខ្សោយ និងធ្វើឱ្យអរម៉ូនឃ្លាន (Ghrelin) កើនឡើង។
– គេងឱ្យបាន ៧-៨ ម៉ោងក្នុងមួយយប់ ដើម្បីឱ្យរាងកាយមានតុល្យភាពអរម៉ូន និងរក្សាដំណើរការដុតរំលាយអាហារឱ្យមានស្ថេរភាព។
៦. ញ៉ាំអាហារហឹរ និងតែបៃតង
-ម្ទេស៖ សារធាតុ Capsaicin ក្នុងម្ទេសជួយបង្កើនកម្តៅក្នុងខ្លួន និងដុតកាឡូរីបន្ថែម។
-តែបៃតង (Green Tea)៖ សម្បូរដោយសារធាតុប្រឆាំងអុកស៊ីតកម្ម ដែលជួយបំប្លែងជាតិខ្លាញ់ទៅជាថាមពលបានកាន់តែប្រសើរ។