​កុំទុកយូរពេក! អាថ៌កំបាំងរក្សាសាច់មាន់ឆ្អិនក្នុងទូទឹកកកឱ្យមានសុវត្ថិភាព និងចៀសផុតពីការពុលចំណីអាហារ​

យោងតាមការចុះផ្សាយពីប្រភពបរទេស ការធ្វើម្ហូបពីសាច់មាន់ទុកញ៉ាំច្រើនថ្ងៃជាជម្រើសដ៏ល្អសម្រាប់អ្នករវល់ ប៉ុន្តែអ្នកជំនាញផ្នែកសុវត្ថិភាពចំណីអាហារបានដាស់តឿនថា សាច់មាន់ដែលឆ្អិនហើយអាចរក្សាទុកក្នុងទូទឹកកកបានត្រឹមតែ ៣ ទៅ ៤ ថ្ងៃ ប៉ុណ្ណោះ ក្នុងសីតុណ្ហភាពក្រោម ៤អង្សាសេ។

ទោះបីជាទូទឹកកកជួយពន្យឺតការលូតលាស់របស់មេរោគ ប៉ុន្តែបាក់តេរីកាចៗដូចជា Salmonella នៅតែអាចកើនឡើងយឺតៗ ដែលពេលខ្លះវាមិនបញ្ចេញក្លិនស្អុយ ឬប្រែពណ៌ឱ្យយើងដឹងភ្លាមៗឡើយ ដូច្នេះការទុកយូរហួសកំណត់គឺជាហានិភ័យខ្ពស់បំផុតសម្រាប់សុខភាព។

ដើម្បីរក្សាសុវត្ថិភាពឱ្យបានល្អបំផុត អ្នកគួរច្រកសាច់មាន់ក្នុងប្រអប់ដែលមានគម្របបិទជិត ហើយដាក់ចូលទូទឹកកកឱ្យបានលឿនក្នុងរង្វង់ ២ ម៉ោងក្រោយពេលធ្វើឆ្អិន។ ប្រសិនបើចង់រក្សាទុកឱ្យបានយូររាប់ខែ អ្នកអាចដាក់ក្នុងចន្លោះកក​ប៉ុន្តែរាល់ពេលយកមកញ៉ាំវិញ ត្រូវតែកម្តៅឱ្យក្ដៅខ្លាំងដល់សីតុណ្ហភាព ៧៤អង្សាសេ ដើម្បីសម្លាប់មេរោគដែលបង្កប់ខ្លួន។

ចូរចងចាំថា ប្រសិនបើសាច់មាន់មានក្លិនជូរ ផ្ទៃខាងលើឡើងរំអិលស្អិត ឬប្រែពណ៌ទៅជាប្រផេះ អ្នកត្រូវបោះវាចោលភ្លាមៗដោយមិនបាច់ស្ដាយឡើយ ដើម្បីការពារសុវត្ថិភាពគ្រួសារអ្នកពីគ្រោះថ្នាក់ដែលមើលមិនឃើញ​៕