​កម្ចាត់ខ្លាញ់ក្បាលពោះ! ទម្លាប់អាក្រក់ ៥ យ៉ាងដែលធ្វើឱ្យដុះក្បាលពោះ និងបង្កគ្រោះថ្នាក់ដល់សរីរាង្គក្នុង

យោងតាមការចុះផ្សាយពីប្រភពបរទេស ការដុះក្បាលពោះមិនត្រឹមតែប៉ះពាល់ដល់សម្រស់ប៉ុណ្ណោះទេ ប៉ុន្តែវាគឺជាសញ្ញាព្រមាននៃ “ខ្លាញ់រុំសរីរាង្គ”​ ដែលនៅជុំវិញថ្លើម ក្រពះ និងពោះវៀន។ ខ្លាញ់ប្រភេទនេះគឺជាមេខ្លោងបង្កជំងឺទឹកនោមផ្អែមប្រភេទទី២ ជំងឺបេះដូង និងមហារីកមួយចំនួន។

បើតាមអ្នកជំនាញ កំណើនខ្លាញ់ទាំងនេះភាគច្រើនកើតចេញពីរបៀបរស់នៅមិនសុខភាព និងទម្លាប់ដែលយើងមើលរំលងជារៀងរាល់ថ្ងៃ។ទម្លាប់ចម្បងដែលជំរុញឱ្យដុះក្បាលពោះខ្លាំងបំផុតគឺ ការញ៉ាំមិនត្រឹមត្រូវ ជាពិសេសការនិយមអាហារកែច្នៃ អាហាររហ័ស និងភេសជ្ជៈផ្អែមៗដែលមានកាឡូរីខ្ពស់តែគ្មានជីវជាតិ។ ការញ៉ាំអាហារពេលយប់ជ្រៅក៏ជាបញ្ហាធំដែរ ព្រោះរាងកាយដុតរំលាយថាមពលយឺតនៅពេលយប់ ធ្វើឱ្យកាឡូរីលើសទាំងនោះបំប្លែងទៅជាខ្លាញ់ស្តុកទុកភ្លាមៗ។ បន្ថែមពីនេះ ការអង្គុយច្រើនពេក ដោយខ្វះសកម្មភាពរាងកាយ ក៏ធ្វើឱ្យប្រព័ន្ធរំលាយអាហារចុះខ្សោយ និងបង្កើនការស្តុកទុកខ្លាញ់ត្រង់តំបន់ពោះផងដែរ។

កត្តាផ្លូវចិត្ត និងការសម្រាកក៏សំខាន់មិនចាញ់គ្នាដែរ។ ការគេងមិនគ្រប់គ្រាន់ ធ្វើឱ្យអ័រម៉ូនឃ្លានកើនឡើង ខណៈអ័រម៉ូនឆ្អែតថយចុះ ដឹកនាំឱ្យយើងញ៉ាំច្រើនខុសធម្មតា។ ចំណែក ស្ត្រេសរ៉ាំរ៉ៃ នឹងបញ្ចេញអ័រម៉ូន Cortisol ដែលជំរុញឱ្យរាងកាយសន្សំខ្លាញ់ចំតំបន់ក្បាលពោះតែម្ដង។

ចុងក្រោយគឺ ការសេពគ្រឿងស្រវឹងហួសប្រមាណ ដែលផ្ដល់ត្រឹមតែ “កាឡូរីទទេ” គ្មានជីវជាតិ និងធ្វើឱ្យប្រព័ន្ធរំលាយអាហារយឺតយ៉ាវ បង្កើតបានជា “​ដុះក្បាលពោះធំ” ដែលពិបាកកម្ចាត់។ ការកែប្រែទម្លាប់ទាំង ៥ នេះ គឺជាគន្លឹះមាសដើម្បីសុខភាពមាំមួន និងរាងកាយស្អាតសមសួន​៕