យោងតាមការចុះផ្សាយពីប្រភពបរទេស បញ្ហាស្នាមលឿងជាប់កអាវសដែលពិបាកបោកជម្រះ លែងជាកង្វល់ទៀតហើយជាមួយនឹងរូបមន្តសម្ងាត់ពីអ្នកជំនាញហាងបោកអ៊ុត ដែលប្រើប្រាស់ត្រឹមតែ “ទឹកលាងចាន” និង “ថ្នាំដុសធ្មេញ” លាយបញ្ចូលគ្នាក្នុងកម្រិតស្មើគ្នា។
មូលហេតុដែលវិធីនេះមានប្រសិទ្ធភាពខ្ពស់ គឺដោយសារទឹកលាងចានមានសមត្ថភាពជម្រះជាតិខ្លាញ់ដែលចេញពីស្បែកបានយ៉ាងល្អ ចំណែកឯថ្នាំដុសធ្មេញជួយដុសខាត់ក្អែលដែលកប់ជ្រៅក្នុងសរសៃក្រណាត់ឱ្យរបូតចេញមកក្រៅយ៉ាងងាយស្រួលដោយមិនបំផ្លាញសាច់ក្រណាត់ឡើយ។
ដើម្បីទទួលបានលទ្ធផលល្អឥតខ្ចោះ អ្នកគ្រាន់តែយកល្បាយដែលលាយរួចទៅលាបលើស្នាមលឿង រួចប្រើច្រាសដុសធ្មេញចាស់ដុសខាត់តិចៗ រួចយកទៅត្រាំក្នុងទឹកក្ដៅឧណ្ហៗសីតុណ្ហភាពប្រហែល ៤០ អង្សាសេ រយៈពេល ៣០ នាទី មុននឹងយកទៅបោកសម្អាតតាមធម្មតា។ វិធីសាស្ត្រសាមញ្ញនេះមិនត្រឹមតែជួយសន្សំសំចៃថវិកាក្នុងការទិញអាវថ្មីប៉ុណ្ណោះទេ ប៉ុន្តែវាក៏ជាការថែរក្សាអាវសំណព្វចិត្តរបស់អ្នកឱ្យនៅមានពណ៌សភ្លឺថ្លា និងប្រើប្រាស់បានយូរអង្វែងដោយមិនបាច់ពឹងផ្អែកលើសារធាតុគីមីខ្លាំងៗឡើយ៕