យោងតាមការចុះផ្សាយពីប្រភពបរទេស ធ្លាប់ឆ្ងល់ទេថា ហេតុអ្វីបានជាបន្លែផ្លែឈើខ្លះទើបទិញមកសោះ បែរជាឆាប់ស្រពោន ឬរលួយទាំងដែលដាក់ក្នុងទូទឹកកក?
តាមពិតទៅ បញ្ហាមិនមែនមកពីទូទឹកកកឡើយ ប៉ុន្តែវាបណ្តាលមកពី “ហ្គាសអេទីឡែន” ដែលផ្លែឈើខ្លះបញ្ចេញមកដើម្បីឱ្យឆាប់ទុំ។ ប្រសិនបើអ្នកដាក់បន្លែដែលងាយប្រតិកម្មនឹងហ្គាសនេះនៅក្បែរវា នោះវានឹងធ្វើឱ្យបន្លែទាំងនោះប្រែពណ៌ លឿង និងរលួយលឿនជាងធម្មតាដល់ទៅច្រើនដង។
គូសត្រូវដែលអ្នកគួរញែកចេញពីគ្នាជាដាច់ខាត រួមមានផ្លែប៉ោម និងបន្លែស្លឹកបៃតង ព្រោះផ្លែប៉ោមជាមេបញ្ចេញហ្គាសដែលធ្វើឱ្យបន្លែស្លឹកឆាប់លឿង និងស្រពោនក្នុងពេលដ៏ខ្លី។ ចំណែកដំឡូងបារាំង និងខ្ទឹមបារាំង ក៏មិនគួរនៅក្បែរគ្នាដែរ ព្រោះវាជំរុញឱ្យដំឡូងបារាំងដុះពន្លកមានជាតិពុល និងធ្វើឱ្យខ្ទឹមបារាំងឆាប់រលួយវិញ។ ជាពិសេស ចេកទុំគឺជាអ្នកបង្កបញ្ហាខ្លាំងបំផុតដល់ផ្លែឈើដទៃដូចជាស្វាយ ឬប័រ ឱ្យទុំជោរហូតរលួយបាត់បង់រសជាតិ។ សូម្បីតែឪឡឹក និងតាសក់ ក៏ងាយរងគ្រោះពីហ្គាសរបស់ប៉េងប៉ោះ ដែលធ្វើឱ្យសាច់ផ្លែឈើទាំងនោះប្រែជាទន់ជ្រាយ និងបាត់បង់ភាពស្រស់ស្រួយគួរឱ្យស្ដាយ។
ដើម្បីរក្សាភាពស្រស់បានយូរ និងសន្សំថវិកា អ្នកគួរប្រើថង់ហ្ស៊ីប ឬប្រអប់បិទជិតដើម្បីទប់ស្កាត់ការភាយហ្គាសទៅរកគ្នា និងចងចាំថា “ញែកផ្លែប៉ោម ញែកចេក និងញែកខ្ទឹមបារាំង” ចេញពីបន្លែដទៃជាដាច់ខាត។ លើសពីនេះ ការមិនលាងបន្លែទុកចោលក៏ជាវិធីសាស្ត្រដ៏ល្អ ព្រោះសំណើមអាចបង្កឱ្យដុះផ្សិតបានលឿន។ ការយល់ដឹងពីបច្ចេកទេសទុកដាក់សាមញ្ញៗទាំងនេះ នឹងជួយឱ្យអ្នកមានបន្លែស្រស់ៗញ៉ាំបានយូរ និងមិនខ្ជះខ្ជាយថវិកាឡើយ៕